Eftir at samgongan hevur traðkað so nógv á fakfeløgini, tikið nógv meira skatt av pensjónum og givið teimum ríku stóran skattalætta, so var væntandi, at tey í reinari eyðmýkt fóru at lata frá sær hesi órímuligu rættindi, sum tingfólk hava fingið sær. At hugsa sær, at tingfólk í 2012 kunnu vera so ósmæðin og veruliga halda tað vera rætt, at tey ikki skulu gjalda skatt av síni inntøku eins og onnur fólk, tað ber boð um eina korrumperaða politiska skipan, sum sýnir markleysan frekleika.
Men Miðflokkurin, Fólkaflokkurin og Sambandsflokkurin halda, at ting- og landsstýrisfólk ikki skulu gjalda skatt sum onnur fólk. Bill Justinussen, Bárður Nielsen, Jákup Mikkelsen og Rodmundur Nielsen siga, at tað er »óneyðugt at heita á formansskapin um at broyta hetta«, tí hetta er ein uppgáva, sum frammanundan liggur hjá formansskapinum.
»Óneyðugt!« siga teir... Snikk snakk! Tað er fullkomiliga líka mikið, hvar hendan uppgávan liggur. Tað eru tingfólk, sum eiga avgerðina, og tað eru bara tingfólk, sum kunnu broyta avgerðina. Alt annað uttanumtos er kávalótir, tí tingfólk vilja kráma sum mest í egnan lumma.
Tað eru so nógv vallyfti, sum eru svikin síðani løgtingsvalið. At tingfólk so ósmæðin vilja kráma sum mest í egnan lumma er frekleiki, sum hevði fingið Nicolae Ceau?escu og aðrar markleysar kraddarar at rodnað av skomm.
Men hóast sjálvsøkna álitið frá meirilutanum í fíggjarnevndini, so er málið ikki fallið enn. Sosialt tilvitað fólk eru í samgonguni. Undan valinum var Jenis av Rana ein. Hann tosaði nógv um fátækramark og órímuligan skattalætta til rík. Hetta nevnir hann ikki longur, helst av skomm. Ein onnur er Jóna Mortensen, sum sigur tey veiku hava sítt hjarta.
Tað er í lagi, at politikarar fáa góða løn, tí annars fáa vit ikki góðar politikarar. Men tað er altso ikki í ordan, at politikarar ikki gjalda skatt sum onnur fólk. Eitt er, at tað er órættvíst, men tað ger eisini, at teir ikki merkja síni sparitiltøk á egnum lumma eins og onnur fólk og eru tí ikki førir fyri at umboða fólkið, tá táttast skal í fíggjarliga.
Tað er stór vanærilig skomm, um løgtingið í reinari egoismu ignorerar eitt uppskot um at demokratisera og javnseta politikarar skattliga við fólkið.
