Alt gott um grøna hugsunarháttin hjá Tórshavnar kommunu. Royndin við ókeypis bussleiðini eru góð – ja beinleiðis genial. Hetta er uttan iva besti mátin at venja fólk við at brúka bussin.
Men hóast grønan hugsunarhátt, so er ikki neyðugt hjá Tórshavnar kommunu at føra ein so hatskan bilpolitikk. Tað tykir nærmast, sum um borgarstjórin vil hava ein bilfrían miðbý. Og vil hann tað, so fær hann eisini ein fólkatóman og handilstóman miðbý. Ein treyt fyri handilslívinum í miðbýnum er, at tað ber til hjá fólki at koma í býin við bili - og fáa sett bilin frá sær.
Tórshavnar kommuna gjørdi eina roynd í áttatiárunum at steingja Niels Finsensgøtu - gongugøtuna - fyri allari bilferðslu. Hetta merkti beinanvegin, at sølan í handlunum fór í botn. So varð latið uppaftur, og vit fingu eina gongugøtu við bilum og parkeringsplássum, og so blómaði handilslívið aftur.
Tað er ikki uttan orsøk, at eitt nú SMS hevur brúkt kanska hundraðtals milliónir upp á parkeringspláss og parkeringskjallara. Tey hava sjálvandi sæð, at uttan góð parkeringsviðurskifti, so fáa tey ikki fólk at koma í SMS.
Í miðbýnum í Havn verður ikki hugsað um veðurviðurskifti, tá bygt verður – og havandi veðurlagið í huga – og vænta sær, at fólk fara at parkera langt uttan fyri miðbýin og koyra við sjútsbussum oman í býin til smáørindi, tað er so veruleikafjart, sum nakað kann vera.
Í størri býum so sum Keypmannahavn, París ella New York, har ber til at hava skipað viðurskifti við parkering. Har kunnu tey hava serligar reglur fyri tey sum búgva í miðbýnum, aðrar til tey sum arbeiða í miðbýnum og uppaftur aðrar til fólk, sum bara hava smáørindi. Hetta ber av onkrari orsøk ikki til í Havn. Her eru tað bara landsstýrisfólk og starvsfólk hjá Tórshavnar kommunu sum fáa sersømdir við parkering á almennum vegi.
Ynskir býráðið ein lívligan miðbý – har handilslívið blómar, so er at lurta eftir teimum, ið kenna trupulleikan og virða tørv teirra.
