Eitt er at hava fingið bøkur á prenti. Men tað var eitt stórt framstig, at bøkurnar eisini eru tøkar á netinum. Uppaftur størri varð framstigið, tá Mentamálaráðið og Sprotin gjørdu avtalu um, at øll, sum ganga í skúla skuldu hava fría atgongd til teldutøku orðabøkurnar.
Tað síðsta stigið hjá forlagnum í Vestmanna er at geva út sonevnda »app« til snildtelefonir við orðabókunum. Hetta er eitt fantastiskt tiltak, sum vit øll eiga at fegnast um – at nakað, sum plagdi at vera so turt og keðiligt sum orðabøkur beinleiðis kann gerast spennandi og mennandi hjá ungum at leita í – annaðhvørt á telduni ella í telefonini. Hetta er av sonnum nýbrot í føroyskum málstrevi.
Jonhard Mikkelsen, stjóri á Sprotanum, var í 2011 heiðraður við Mentanarvirðisløn Landsins fyri sítt verk at geva út bøkur. Fleiri enn 100 bøkur eru komnar út á privata forlagnum í Vestmanna – bøkur við rættiliga ymsum innihaldi. Ella sum Helena Dam á Neystabø, táverandi landsstýriskvinna segði í samkomu í Norðurlandahusinum:
»Heilt frá smáum yrkingasøvnum til stórar skaldsøgur til bøkur um føroyska málið, uppaling, skaldsøgugreining og snarskeið í stavseting, ja tú kanst siga: frá orðálvi til ull«.
Vit eiga at fegnast um, at vit hava slíkar eldsálir. Tí tað er slíkur eldhugi, sum nørir um mentan okkara málsliga.
Tað er sagt um Jonhard Mikkelsen, at tá hann ikki slapp at geva eina bók út hjá Skúlabókagrunninum, so fór hann í Sparikassan og tók eitt lán í staðin – og so kom bókin út, sum kanska beinleiðis elvdi til forlagið Sprotan?
Stóra orðabókaarbeiðið hjá Sprotanum letur talgildu dyrnar upp til fleiri heimsins mál – og ikki minst til føroyska rættstaving. Frá Svabo og Hammershaimb – og frá Kristiani Matras og Jóannes av Skarði og Jóan Heindriki og hinum slóðarunum eru vit nú bara eitt »klikk« frá røttu stavsetingini ella røttu bendingini. Ein slík app er kærkomin, og eiga øll at gera sær dælt av tilboðnum hjá Sprotanum um at heinta sær appina. Og ikki minst eiga foreldur at vísa børnum á hendan gylta møguleikan altíð at hava orðabókina uppi á sær.
