Í dag, fýra og eitt hálvt ár seinni, er hon um at hokna undir fíggjarligu avleiðingunum av hesi avgerð. Fýra ár uttan eina krónu í inntøku seta síni spor hjá 61 ára gomlu kvinnuni.
Almennu Føroyar hava eina skipan, har eitt stovnstilboð er einasta loysnin fyri Ólav og fólk í somu støðu. Hóast stovnsplássið kostar umleið eina millión um árið. Og hóast stovnsplássið mangan ikki er nøktandi fyri tørvin hjá tí einstaka.
Okkara grannalond hava í áravís arbeitt við einum alternativi, sum á fakmáli nevnist Brúkarastýrd Persónlig Atstøða. Tað merkir í stuttum, at brúkarin sjálvur er við til at velja sítt tilboð. Tað merkir, at Malena kundi verið sett í starv av tí almenna fyri at taka sær av sínum vaksna soni. Hon kundi tí fingið løn fyri tað arbeiði, sum hon í dag ger ókeypis fyri tað almenna.
Men í Føroyum er ikki lógarheimild til at veita fíggjarliga hjálp til tey, ið átaka sær uppgávuna at taka sær av einum fólki, ið er millum 18 og 67 ár. Javni eftirlýsir eina broyting, landsstýriskvinnan sigur seg arbeiða við málinum, men einki hendir.
Løgtingið hevur samtykt ST-sáttmálan um rættindi hjá teimum, ið bera brek. Við samtyktini sigur løgtingið seg taka undir við, at allir borgarar skulu sleppa at velja sær sín bústað og velja, hvar og saman við hvørjum, tey vilja liva. Løgtingið hevur bundið seg til at hjálpa familjum í somu støðu sum familjan, ið fortelir sína søgu í blaðnum ídag.
ST-sáttmálin kom í gildi fyri Føroyar í 2009. Men nú 2013 fer at halla er støðan óbroytt. Vælferðarsamfelagið Føroyar dúvar framvegis upp á móðirkensluna hjá Malenu, sum loftar tí uppgávu, sum tað almenna ikki megnar at lyfta.
Vónandi er tað ikki so, at almennu Føroyar gera sær dælt av støðuni. Tí fyri Malenu er einki alternativ. Almennu Føroyar eiga at lofta fólki við serligum tørvi, tá tey gerast 18 ár. Men almennu Føroyar hava einki nøktandi tilboð til Ólav og onnur í somu støðu. Tí dúva vit framvegis uppá ókeypis vælferð frá Malenu. Hvussu leingi kann eitt vælferðarsamfelag gera tað?
