Kritikkurin heglaði annars niður yvir Jørgen Niclasen fyri einum ári síðani, tá hann varð valdur til formann við eini demokratiskt ivasamari valskipan, sum Fólkaflokkurin hevði til at velja formann. Serliga tað, at Annika Olsen fekk 1344 atkvøður á løgtingsvalinum, meðan Jørgen Niclasen bert fekk 382.
Sambært Sjúrði Olsen hevur hetta stríðið fylt nógv í valstriðnum til kommunuvalið – hann sigur, at veljarin revsar nú Fólkaflokkin í Havn. Tað er tó ilt at síggja, hvar hetta stríðið hevur fylt. Í almenna valstríðnum hevur einki verið hoyrt um hetta stríð, so um tað hevur fylt nógv í Fólkaflokkinum, so man tað vera innanhýsis.
Jørgen Niclasen royndi at lítisgera útsøgnina hjá Sjúrði Olsen við at siga, at kommunuvalið í Havn var ein fólkaatkvøða um Heðin Mortensen. Tað kann væl verða, at so var. Men valla er orsøkin til vantandi undirtøkuna hjá Fólkaflokkinum at finna har. Førdi politikkurin hjá samgonguni kann hava havt sína ávirkan – men størstu ávirkanina man vantandi politikkurin hjá Fólkaflokkinum í Tórshavnar Býráð hava. Hóast Fólkaflokkurin hevur havt trý umboð – og fýra seinasta árið, so hava Heðin Mortensen og hansara fólk havt frítt spæl, tí mótspæl kom einki frá andstøðuni í býráðnum.
Tú kanst siga, at tað er so lætt hjá einum karismatiskum borgarstjóra at vinna stórsigur – men uppaftur lættari er tað, tá hann onga mótstøðu fær, sum hann nátúrliga átti at fingið frá eini árvaknari andstøðu.
Men Jørgen Niclasen situr uttan iva tryggur í sínum formanssessi. Tað vildi verið ein politisk katastrofa fyri Fólkaflokkinum, um tey bara so mikið sum umhugsaðu at koyra hann frá sum formann. Eingin formaður í Fólkaflokkinum hevur nakrantíð fyrr megnað at fingið flokkinum so stóra ávirkan, sum Jørgen Niclasen. Við øllum atkvøðuneytunum í Sambandsflokkinum hevur Jørgen Niclasen frítt spæl.
Óvist er, um Annika Olsen hevði megnað tað sama, sum Jørgen Niclasen hevur megnað. Jørgen Niclasen hevur so prógvað sítt virði sum formaður Fólkafloksins.
