Tað kann ganga skjótt, tá tað gongur væl, og soleiðis var í gekka-spælinum í kvøld.
Tí, longu í fyrsta drátti eydnaðist tað einari kvinnu, sum ringdi úr Klaksvík, at vinna fyri eitt árskeyp á 104.000 krónur í Bónus.
- Bónus-handlar eru kring landið, og keypið kann gerast í øllum Bónus-handlum, segði verturin í gekkaspælinum í kvøld, Magnus Magnussen.
Tað var Hanna Vang í Klaksvík, sum fekk fulla plátu og slapp at snara hjólinum. Hon segði, at tey sótu seks fólk við átta gekkum.
Høvuðsvinningurin í kvøld var á 1,1 miljónir krónur, sum var í gula leypinum. Í hinum báðum leypunum vóru cruise-ferðin og vinningurin í Bónus.
Longu í fyrstu royndini hjá Honnu Vang steðgaði hjólið á bláa leypinum. Nú var látur og meylan at hoyra aftan fyri kvinnuna í horninum, og frøin var stór.
- Vit steðga. Óført. Vit siga takk fyri góða vinningin, segði kvinnan úr Klaksvík, sum nú kann keypa fyri 2000 krónur um vikuna í eitt heilt ár.
