Nú er semja fingin í lag um, hvussu nógv prísurin á streymi skal hækka næsta ár. Tað sigur Kári Johansen, formaður í nevndini fyri SEV.
Annars var eykaaðalfundur í SEV herfyri og tá var ætlanin at áseta prísin á streymi næsta ár. Tá var uppskotið hjá nevndini í SEV, at prísurin skuldi hækka 25 oyru fyri kilowattið næsta ár. Hjá einum vanligum húski svarar tað til eina eyka útreiðslu upp á einar 1000 krónur um árið.
Tað eru kommunurnar, sum eiga SEV og tað vóru summar kommunur, sum hildu, at tað var ov stór príshækking og tað komu fleiri uppskot um aðrar hækkingar. Hetta var stutt fyri løgtingsvalið og tað fekk formannin í nevndini fyri SEV at slíta fundin, tí hann helt, at borgarstjórar høvdu fingið valfepur.
Samstundis staðfesti hann, at tað verður neyðugt við eini príshækking, sum fer at liggja umleið á hasum stiginum, tí annars fer roknistykkið hjá SEV ikki at ganga upp.
Hann sigur, at síðani hevur nevndin í SEV viðgjørt málið av nýggjum – og tey eru samd um at gera eina broyting.
Hann vil ikki siga akkurát, hvat tey eru samd um. Men tað verður avdúkað, tá ið eykaaðalfundurin í SEV verður uppafturtikin fríggjadagin.
Men hann sigur, at SEV hevur havt fund við allar kommunurnar og har var semja um príshækkingarnar, sum ætlanin er at seta í verk og tí ivast hann ikki í, at tað nýggja uppskotið hjá nevndini verður samtykt fríggjadagin.
Hóast hann ikki vil siga ítøkiliga, hvørjar hækkungarnar verða, avdúkar hann kortini nakað. Í hesum sambandi sigur hann, at hjá vanligum húsarhaldum verður príshækkingin ikki so stór, sum upprunaliga ætlað, men afturfyri verður hækkingin hjá stórbrúkarum, ella teimum stóru vinnuvirkjunum, eitt sindur størri.
Høvuðsorsøkin til príshækkingina er, at prísurin á olju er nógv hækkaður, samstundis sum at vit standa fyri einum grønum, men dýrum, orkuskifti.
