Fiskiveiðieftirlit
Norðbúgvin hevur mist fiskiloyvi í fyribils tvær vikur. Skipið fiskaði í føroyskum sjógvi, tá manning av Brimli kom umborð leygardagin. Sambært fiskiloyvinum hjá Norðbúgvanum hevur hann ikki loyvi til tess. Tí varð fiskiloyvið inndrigið.
Martin Kruse, vakthavandi á Fiskiveiðieftirlitinum, váttar fyri Sosialinum, at fiskiloyvið er tikið frá Norðbúgvanum í fjúrtan dagar. Reiðaríið hevur tó rætt at kæra avgerðina, sum so kann enda í rættinum. Fyrbils er tó ikki ætlan um nakað rættarmál, sigur Martin Kruse.
Málið verður nú viðgjørt í Fiskimálaráðnum, har avgjørt verður, hvussu farið verður víðari fram, ella um nakað meira fer at hendaa í málinum annað enn, at Norðbúgvin fær fiskiloyvið aftur, tá karantenutíðn er av.
Tað er sambært grein 45 í lógini um vinnuligan fiskiskap, at Fiskiveiðieftirlitið kann taka fiskiloyvi aftur fyribils, um mett verður, at fiskiskapurin ikki er sambærligur við tað, fiskiloyvi sigur.
Tað varð í hesum førinum hildið, at Norðbúgvin fiskaði svartkjaft til ídnað í føroyskum sjógvi, og tað hevur hann sambært fiskiloyvinum ikki rætt til.
Norðbúgvin hevur rætt til at fiska svartkjaft til matna í føroyskum sjógvi. Men sagt verður frá teimum, sum taka í móti hesum fiski, at hann í løtuni er ikki egnaður til matna og tí fiska øll skipini til ídnað. Norðbúgvin hevur eisini fyrr avreitt svartkjaft til ídnaðarvirkið Havsbrún í Fuglafirði.
Í seinastu viku landaði hann 600 tons til ídnað í Fuglafirði. Tá segði reiðarin, Bjarti Mohr, við Sosialin, at skipið hevði fiskað í altjóða sjógvi, og tað hevði hann sambært fiskiloyvinum rætt til. Fiskiveiðieftirlitið segði tá, at tey ikki høvdu kannað Norðbúgvan, men upplýsingarnar, tey høvdu fingið frá skipinum, søgdu eisini, at hann hevði verið í altjóða sjógvi.
Leygardagin fór so fólk av Brimli umborð á Norðbúgvan, sum tá var í føroyskum sjógvi, og tað vísti seg tá, at hann fiskaði svartkjaft, sum Fiskiveiðieftirlitið metti skuldi nýtast til ídnað. Tí varð fiskiloyvið tikið beinanveg, og afturhildið í fjúrtan dagar.
Bjarti Mohr, reiðari á Norðbúgvanum, sigur við Sosialin, at hann hevur als onga viðmerking til tað, sum nú er hent.
