Liðini hjá Noah Mneney og Gullbrandi Øregaard vunnu seg í dag víðari til áttandapartsfinalurnar í norsku steypakappingini.
Gullbrandur var á vøllinum allan dystin tá hann og liðfelagarnir í Sandnes ULF, ið spælir í næstbestu deildini á heimavølli vunnu málríkan sigur á gamla liðnum hjá Gilla Rólantssyni, Odd sum spælir í bestu deildini.
Málríki dysturin endaði við 5-4 sigri til Sandnes ULF.
Í steðginum var Sandnes á odda 3-2, og í seinna hálvleik øktu teir til bæði 4-2 og til 5-3.
Noah var eisini á vøllinum allan dystin hjá Bryne á útivølli móti Arendal úr triðbestu deildini.
Tað eydnaðist Bryne at vinna 1-0. Sjur Torgersen Jonassen skoraði sigursmálið longu í 12. minutti.
Sostatt vera trý føroyingalið at finna í áttandapartsfinalunum, Bryne, Sandnes og Fredrikstad.
