Kavarar í Eystursjónum hildu at byrja við, at teir høvdu funnið eina vanliga skrivimaskinu, men veruleikin var ein annar.
Týskir kavarar leitaðu eftir mistum fiskireiðskapi, tá teir komu fram á tólið, sum nazistarnir nýttu sum kotu-tól undir seinna heimsbardaga.
Hesi tíðindi ber danska Ekstrablaðið frá tíðindastovuni Reuters.
Mett verður, at Enigma-tólið er blakað yvir borð frá einum søkkandi kavbáti.
- Eg havi funnið og uppdagað mangt spennandi og løgið síðstu 20 árini. Men eg hevði ikki droymt um, at eg skuldi finna eina av legendarisku Enigma-maskinunum, sigur undirsjóvarfornfrøðingurin Florian Huber.
Enigma-maskinan varð funnin nærhendis oynni Als.
Nazistarnir nýttu undir seinna heimsbardaga Enigma-tólini til at senda og taka ímóti loyniligum boðum, ið vóru krypteraði. Loksins eydnaðist tó bretum at týða kotuna, og fekk hetta avgerðandi týdning fyri gongdina í bardaganum í Atlantshavi.
Stutt fyri, at nazistarnir góvu skarvin yvir í maj 1945, komu boð um at søkkja 50 kavbátar í økinum, har Enigma-tólið er funnið, og mett verður tí, at hetta tól stavar frá einum av kavbátunum.
Hóast fleiri túsind Enigma-tól vórðu framleidd, so eru bert nøkur fá hundrað til í dag, tað fólk vita um. Tólini verða seld fyri meria enn hundraðtúsund krónur á uppboðssølum.
Enigma-tólið, sum nú er funnið, er latið einum savnið í Slesvig.
##med2##
Soleiðis sær ein Enigma-maskina út, tá hon er í góðum standi.
