Náttúran og nærleikin hugtaka ferðafólk mest

Føroyar eiga at verða marknaðarførdar sum ein frískligur skandinaviskur gim­steinur, ið ikki er uppdagaður enn, segði bretski ráðgevin, Simon Anholt, í frá­greið­ing síni um kappingarsamleika Føroya í fjør.
Niðurstøða hansara var, at Føroyar við síni náttúru, søgu og mentan eru ógvuliga sermerktar sum ferðamál, men trupul­leikin er, at fá fólk í heiminum vita, at Føroyar yvirhøvur finnast.
Talið á útlendskum ferðafólkum í Føroyum í 1993 var umleið 25.000, og í 2000 vísti ein kanning, at talið var komið upp á 40.000. Í 2006 varð ferðafólkatalið mett at vera 47.000, men seinastu tvey árini er talið minkað 12-15 prosent.
Samanumtikið ber tó til at staðfesta, at ferðavinnan seinastu 15-20 árini hevur tikið seg fram, og á ferðavinnudeildini hjá Uttanríkisráðnum hevur stjórin, Súsanna Sørensen, góðar vónir um, at vinnan fer at menna seg uppaftur meira.
– Eg vænti, at ferðafólkatalið í Før­oyum fer at vaksa. Vit skulu ikki vænta nakran brádligan vøkstur, men eru vit áhaldandi og miðvís í okkara markn­aðar­føring, fer tað í longdini at geva úrslit, sigur hon.

Ferðavinnan spjótoddur
Súsanna Sørensen hevur sum vera man lisið frágreiðingina hjá Simon Anholt fleiri ferðir, og hon heldur, at ferðavinnan kann brúka nógv av hug­skotunum í frágreiðingini.
– Frágreiðingin snúði seg um kapp­ingarsamleikan hjá Føroyum sum heild, men Anholt nevndi, at ferða­vinn­an eigur at vera spjótoddurin í marknaðar­føringini, tí vit hava so serstaka náttúru, mentan og søgu. Hetta leggja vit longu dent á, sigur hon.
Frískleikin í føroysku náttúruni og ímyndin um óuppdagaða landið í skandi­navisku familjuni verða eisini brúkt, tá ferðavinnudeildin ger vart við Før­oyar.
– Vit gera vart við frískleikan mynda­liga og tekstliga, og tá vit til dømis umrøða hotellini, vísa vit á, at tey hava skandinaviskan standard. Uttan­lands vita fólk, at hetta merkir, at hotell­ini eru ljós og løtt og ikki tung við tepp­um á gólvinum sum tey bretsku, vísir Súsanna Sørensen á.

Stutt at fara allastaðni
Fólk í Føroyum hava upplivað føroysku náttúruna so ofta, at tey síggja ikki altíð, hvussu vøkur hon er. Men tað gera út­lendsku ferðafólkini.
– Í veruleikanum eru vit í Før­oy­um sera tætt knýtt at náttúruni og okk­ara søguliga uppruna, men sam­stundis eru vit rættiliga modernað. Næstan øll eiga føroysk klæðir, og inter­net­samband er á hvørjum tanga. Hendan saman­blandingin av gomlum og nýggjum hugtekur ferðafólk nógv, sigur Súsanna Sørensen.
Ferðafólk hava ofta á orði, sigur hon, at alt í Føroyum er so nær við. Býrt tú á Hotel Føroyum, kanst tú skoða út yvir heimsins minsta høvuðsstað, og fert tú til gongu haðani, ert tú skjótt í nátt­úruni. Koyrir tú so nakrar fáar minuttir í bili, kemur tú til onkra bygd, har fólk liva heilt øðrvísi enn í Havn.
Ferðavinnudeildin hjá Uttanríkis­ráðnum ger sær eisini dælt av, at stutt er at fara allastaðni í Føroyum at fáa øðrvísi upplivingar. Ein yvirskrift á før­oyskari lýsingarherferð í Danmark herfyri var rætt og slætt TÆT PÅ, har víst varð á, hvussu nær alt er í Før­oyum.
– Vit hava nógv at bjóða í Føroyum, ikki bara stórsligna náttúru, men eisini matstovur, náttarlív og list. Trupulleikin er kanska, at vit mugu brúka nógv orð fyri at siga, hvat vit hava at bjóða, tí onki einstakt ting eyðkennir okkum. Tá er lættari hjá til dømis íslendingum at tosa um heitar pottar, sigur Súsanna Sørensen.

Talentini skapa umrøðu
Ferðavinnudeildin hevur langt frá líka nógvar pengar at arbeiða við sum kapp­ingarneytarnir í grannalondunum, og tí hevur ein tann týdningarmesti parturin av strategiini verið at bjóða útlendskum tíðindafólkum til Føroya at skriva um landið. Hetta hevur ofta borið ávøkst, eitt nú tá stór grein um Føroyar var í New York Times.
Tá føroyska fótbóltslandsliðið skuldi spæla ímóti Italia, brúkti ferða­vinnu­deildin hjá Uttanríkisráðnum eisini høvið at gera vart við Føroyar hjá italskum journalistum.
– Hetta eydnaðist sera væl, og vit fingu umrøðu í øllum teimum týdn­ingar­mestu ferðavinnubløðunum í Italia. Samstundis sum vit arbeiða á hendan hátt, bjóða vit sølufólkum til Føroya, so tey vita, hvat tey skulu selja, tá um­røðan skapar áhuga fyri Føroyum, sigur Súsanna Sørensen.
Høvuðsmarknaðirnir hjá Føroyum sum ferðavinnulandi eru Danmark, Bret­land, Týskland og Italia. Ferða­vinnu­deildin hevur eisini eyguni eftir, hvat hendir á øðrum marknaðum, men ansar eftir ikki at gloypa um ov nógv lond, tí so kann boðskapurin gerast ov spjaddur.
– Ein tann besta reklaman fyri okk­um eru tey føroysku talentini, sum gera vart við seg uttanlands. Nøvn sum Guðrun & Guðrun, Teitur og Gunnar Nielsen eru góðir ambassadørar fyri landið. Tað ger stóran mun, tá tílík fólk gera vart við seg, sigur stjórin á ferða­vinnudeildini.
Hon ivast ikki í, at vitjanir sum tær hjá Bill Clinton, Al Gore, Elton John og Bryan Adams eisini skapa áhuga fyri Før­oyum, ikki minst tí talan er um nøvn, sum øll kenna. Men tann besti ambassa­dørurin fyri Føroyar er eftir leitis­kipanini hjá Google at døma før­oyska fótbóltslandsliðið.
– Okkara kanningar vísa, at áhugin fyri Føroyum á Google økist heilt mun­andi, tá landsliðið spælir. Ongar hend­ingar skapa so stóran áhuga fyri Før­oyum sum landsdystirnir, sigur Súsanna Sørensen.