Nógvar broytingar eru hendar í partafelagsskránni farnu vikuna sambært Business Line. Sjey nýggj feløg eru stovnað, umframt at nógvar nevndarbroytingar eru skrásettar.
Í Havn hevur Róaldur Jacobsen stovnað eitt el-innleggjaravirki og Kári Davidsen hevur stovnað eitt ráðgevarafelag innan persónsdátu og persónsdátuverju.
Í Klaksvík hava Regin Anthoniussen og Rainer Imanuel Latupeirissa stovnað smápartafelagið Plan-Asfalt, sum skal reka entreprenør- og asfaltvirksemi. Teir báðir eru eisini stjórar í felagnum.
Fýra kvinnur, sum munnu vera væl kendar í miðlaheiminum, hava stovnað íverksetarafelagið VEIA. Tær eru Vár Berghamar Jacobsen, Drós í Ólavsstovu, Angela Petersen og Eir í Ólavsstovu. Endamál felagsins er at handla, framleiða, samla og varpa út undirhald og lærutilfar til børn, ung og vaksin.
Hjá Business-Line sæst eisini nýggja felagið hjá Framherja, Kimbili og Varðanum, sum hevur keypt Aluplast og H-Dygd og seinastu nevndarbroytingarnar í Kósini í Klaksvík.
Allar broytingarnar síggjast á heimasíðuni hjá Business Line her.
