Lagið er eitt sterkt og sjálvsikkurt countrypop-lag um at reisa seg eftir eitt “breakup” og finna styrkina í at standa sterk í sær sjálvari.
- Tað hevur eisini eitt sindur av ironi, og tað er sungið við einum smíli og glimt í eyganum, sigur Kristel.
- Eg fór til Nashville fyri at skriva sangir, og ‘Sorry for You’ varð skrivað á fyrstu ferðini har, eins og ‘Say Goodbye’. Henda ferðin merkti ein nýggja byrjan fyri meg – eg vildi skriva um at standa sterkt sum kvinna. Tað er virkuliga ikki altíð lætt og serliga í hesari bansjnuni. Eitt er at føra seg fram sum sangarinna, men tað snýr seg eisini um at tora at pressa seg sjálva fram og opna sær tær hurðar, man ynskir sjálv, sigur Kristel.
All in í country
Kristel er farin “all in” við countrygenruni og ferðast millum Føroyar, Keypmannahavn og Nashville.
- Eg eri ikki bangin longur fyri at taka næsta stig, men heldur bangin fyri um eg ikki geri tað, leggur hon afturat.
Seinnu árini hevur hon sett navn sítt fast sum ein rødd á veg fram í altjóða countryheiminum, við løgum sum “It’s Killing Me”, “One Slow Burn” og “Say Goodbye”.
- Country hevur altíð verið ein stórur partur av røtunum hjá mær. Í Føroyum hevur tónleikurin eina djúpa rót – kanska tí havið er okkara prærie. Eg havi hoyrt søgur um, at sjómenn fóru til Kanada og tóku countryplátur við heim til Føroyar. Eg haldi at vit føroyingar kunnu serliga relatera til country tónleikin, tí søgunar snúgva seg oftast um lívið, fólkið og bygdarlívið. Eg husgi at kanska man kann siga at okkara sjómenn vóru okkara ‘Ocean Cowboys’, sigur Kristel við einum smíli.
Eitt lag vid einum uppbyggjandi boðskapi
“Sorry for You” er eitt stuttligt og positivt lag, sum snýr seg um at standa sterkt, sjálvt um tú ert svikin.
- It’s his loss in the end – og so lati eg karma taka sær av restini, leggur Kristel afturat og flennur. Lagið er skrivað saman við Quinn Loggins og Larry McCoy.
Nashville dream team aftanfyri
Lagið varð upptikið í Nashville í studionum hjá trummusláaranum Shannon Forrest (TOTO, Tim McGraw, Taylor Swift). Framleiðarin er Jimmy Ritchey (George Strait, Jake Owen), og millum teirra, ið spæla á upptøkuni, eru Rob McNelley (gittar hjá Carrie Underwood, Luke Combs) og Craig Young (bass hjá Elton John, Jewel, Post Malone).
Úrslitið er eitt fangandi og persónligt lag – ein fullkomin blanding av attitudu, groove og countrytraditión, framført við serstøku styrkini og nærveruni hjá Kristel Lisberg.
Vit fara at hoyra meira til Kristel Lisberg, og í næstum er hon at hoyra á konsertuni Nashville Night’s sum verdur í OY 6. september og eisini á Nasvhille Night’s festivalinum í Danmark 12 -14 september.
Hoyr lagið her:
##med2##
