Tørvurin á at útvega fleiri dagstovnapláss í Tórshavnar kommunu er støðugur, og nú verða aftur nýggj dagstovnapláss tøk.
Fyrsti partur av gamla Realskúlanum í miðbýnum verður tikin í nýtslu um mánaðarskiftið, og í hesum døgum fáa tey fyrstu umleið 20 børnini tillutað pláss.
Kommunan fer komandi tíðina at gera aðrar smærri tillagingar í realskúlanum soleiðis, at restin av bygninginum er klárur at taka í nýtslu sum dagstovnur í summar.
Virksemið hjá Miðstovninum í Gundadali er sum kunnugt niðurlagt, men stovnurin letur upp aftur í Realskúlanum. Miðstovnurin í Realskúlanum verður ein integrerað vøggustova og barnagarður fyri børn í 0-7 ára aldri.
Asta í Toft, sum seinastu nógvu árini hevur verið leiðari í Miðstovninum í Gundadali, verður eisini leiðari í Miðstovninum í Realskúlanum og í vøggustovuni í Hornabø.
Fólkatalið í Tórshavnar kommunu veksur alsamt, og kommunan arbeiðir tí framhaldandi eisini við at útvega enn fleiri dagstovnapláss.
