Hugskotið um eina flogbreyt gjøgnum Klovan tykist hava stóran áhuga, helst tí at nógvar sparingar eru við at brúka felags terminal og aðrar fasilitetir saman við verandi vølli Í farnu viku kom fram uppskotið hjá Sørvágs kommunu um at gera nýggja hjábreyt til flogvøllin norð gjøgnum Klovan í nánd av verandi flogvølli í Vágum.
Borgarstjórin í Sørvági, Jákup Suni Lauritsen hevur síðani uppskotið kom fram fyri almenningin í farnu viku, kunnað nevndina í P/F Vága Floghavn um uppskotið. Nevndin er á einum máli um, at uppskotið er sera áhugavert og letur upp fyri fleiri spennandi møguleikum rakstrarliga, og tá talan er um logistik.
Sørvágs kommuna hevur givið P/F Vága Floghavn tilsøgn um eina positiva viðgerð av útbygging av flogvøllinum í Vágum. Kommunan, er umframt at vera uppskotsstillari til nýggja flogvøllin í Klovanum, eisini byggimyndugleiki á økinum. Partarnir eru samdir um at hava tætt samskifti um málið.
Sagt verður, at P/F Vága Floghavn hevur enn ikki fingið tær heimildir frá Løgtinginum, sum eru neyðugar, fyri at fara til verka í Vágum.
- Vit vóna og vænta, at eitt av fyrstu málunum sum nýggja løgtingið avgreiðir, tá tað fer til arbeiðis, er at geva nevndini í P/F Vága Floghavn neyðuga myndugleikan at fara til verka, so útbyggingin av Vága Floghavn kann fremjast, sigur Jákup Suni Lauritsen.Sørvágs kommuna er eisini í samband við Landsverk. Partarnir fara í næstum at tosa saman um uppskotið.
