Á Skiftirættarfundi í morgun varð Christian Andreasen valdur til bústjóra í Faroe Fish 2 saman við Eyðfinni Jacobsen, sum er við í báðum trotabúnum. Tá Faroe Seafood varð sent Skiftirættinum fríggjadagin, 3. desember, valdi Skiftirætturin tveir fyribils bústjórar, Inga Højgaard og Eyðfinn Jacobsen, advokatar.
Í morgun var nýggjur skiftirættarfundur, og tá avgjørdi Skfitirætturin eftir áheitan frá búnum og kreditorum, at Eyðfinnur Jacobsen heldur fram í Faroe Seafood og í Faroe Fish 2, sum átti skipini, Bak, Stelk, Lóm, Lerk, Heyk og Falk, meðan Ingi Højgaard heldur fram í Faroe Seafood.
Ingi er ikki longur bústjóri í Faroe Fish 2, og í hansara stað í hesum trotabúnum er komin Christian Andreasen, advokatur, umboðandi eitt nú Bank Nordik og Realin.
Í Faroe Fish 2 umboðar Eyðfinnur Jacobsen búgvið og Realin.
Á Skiftirættarfundinum í morgun varð mett, at samlaða virðið av samtakinum liggur um eina fjórðings miljard krónur.
Næsti skiftirættarfundur í báðum trotabúnum verður hin 17. mars í 2011.
