Seinasta kappingarár hevði Chelsea ávísar álopstrupulleikar. Álopsleikararnir Samuel Eto’o, Demba Ba og Fernando Torres skoraðu ov fá mál. Hetta hevði við sær, at felagið fyrr í summar slapp sær av við Samuel Eto’o og Demba Ba. Einasti maður, ið framvegis er í felagnum, er spanski áleyparin Fernando Torres.
Harafturímóti hevur felagið keypt nýggjan spanskan áleypara í Diego Costa, umframt at Chelsea legendan Didier Drogba er aftur í felagnum, eftir tvey ár í øðrum feløgum.
José Mourinho greiðir enskum miðlum frá, at viðleikararnir eru yvirraskaðir av støðinum hjá Diego Costa.
- - Hann er framúr góður spælari. Tekniskt er hann væl fyri og serliga tað hevur yvirraska viðleikararnar. Umframt tað, er hann sera sterkur kropsliga og arbeiðir altíð so hart sum gjørligt fyri liðið.
- - At hava Diego Costa, Fernando Torres og Didier Drogba í álopinum nú gevur okkum ymiskar dygdir. Eg meti at álopið hjá okkum er sera væl fyri til komandi kappingarár.
Harafturat er José Mourinho eisini sera væl nøgdur við keypið av Cesc Fabregas frá Barcelona.
- - Sum eg síggi Fabregas, er hann ein leikari, ið sær fótbólt skjótari enn aðrir leikarar. Hann er umráðandi hjá okkum at hava á miðvøllinum, fyri at hava annað enn styrki og renniorku. Hann hevur bóltførleikan og er framúr til at stýra spælinum. Fyri mær hevur hann alt, sum ein miðvallari skal hava.
Chelsea spælir sín fyrsta dyst í Premier League tann 18 august, tá liðið á útivølli spælir móti uppflytarunum úr Burnley.
