Tríggir aðrir dystir vóru eisini á skránni í Champions League kappingini í gjárkvøldið. Í einum teirra skuldi kontroversielli Chelsea-venjarin, José Mourinho, aftur á gamlar gøtur, tá Chelsea vitjaði hjá gamla felag hansara, FC Porto.
Dysturin var ikki nógvar minuttir gamal, fyrrenn Raul Meireles hevði lagt Porto á odda. Hetta hendi, meðan Chelsea-liðskiparin, John Terry, lá uttanfyri vøllin til viðgerðar. Terry kom ikki aftur á vøllin, og í hansara stað kom Arjen Robben.
Hetta var ein góð avgerð hjá Mourinho. Bert fáar minuttir eftir málið spældi Robben Shevchenko púra leysan, og hesin javnaði til 1-1, sum eisini gjørdist endaliga úrslitið.
Ein dystur var eisini á skránni millum Inter og Valencia. Hesin endaði 2-2. Cambiasso legði Inter á odda um miðjan fyrra hálvleik, áðrenn David Villa javnaði um miðjan seinna hálvleik. Maicon legði tó aftur Inter á odda, men fýra minuttir fyri leiklok fekk Silva útjavnandi málið fyri Valencia.
Í síðsta dystinum spældu Roma og Lyon 0-0.
