Í minsta lagi 24 palestinar eru dripnir tíðliga í morgun, meðan teir bíðaðu eftir hjálp í Gazageiranum.
Tað stendur í eini fráboðan frá heilsumálaráðnum í Gaza, skrivar tíðindastovan Reuters.
Fleiri ymiskar fráboðanir hava verið um hendingina í morgun.
Reuters skrivaði í fyrsta umfari - grundað á fráboðanir frá fjølmiðlum, sum hava tilknýti til hernaðarligu rørsluna Hamas - at í minsta lagi 20 palestinar eru dripnir.
Hetta skal vera hent, tá teir bíðaðu eftir hjálp nærhendis býnum Rafah.
Rafah liggur har suðuri í Gaza og hevur mark við Egyptaland.
Sambært tíðindastovuni AFP sigur borgaraverjan í Gaza, at ísraelskar herdeildir hava dripið í minsta lagi 15 fólk í suðurpartinum av Gaza.
- Í minsta lagi 15 fólk doyðu og tíggjutals fingu skaða, tá ísraelskar herdeildir skutu við stríðsvognum og dronum eftir túsundtals sivilfólki, sum í lýsingini vóru savnað nærhendis rundkoyringini Al-Alam í Al-Mawasi-økinum í ein landryrðing úr Rafah, sigur talsmaðurin Al-Mawasi.
Men amerikanskt og ísraelskt stuðlaði Gaza Humanitarian Foundation (GHF), sum býtir út hjálp í Gaza, sigur, at býtið í morgun fór fram "uttan trupulleikar."
Tað sigur felagsskapurin í eini fráboðan sambært ísraelska miðlinum Times of Israel.
- Meðan hjálparbýtið varð framt trygt og uttan nakra hending á okkara býtisstaði í dag, skilja vit, at IDF (ísraelski herurin, red.) kannar, um ein røð av sivilum fólkum fingu skaða, eftir at tey fluttu úr ávístu tryggu gongini inn í eitt stongt hernaðarøki, stendur í fráboðanini.
Ísrael hevur ikki gjørt viðmerkingar til fráboðanirnar.
- Vit viðurkenna, hvussu trupul støðan er og mæla øllum sivilum fólki til at halda seg í tryggu gongini, tá ferðast verður til okkara útbýtisstøð, heldur GHF fram.
Sambært felagsskapinum vórðu 21 lastbilar fullir av mati býttir út í morgun - eftir at býtisstaðið í Rafah hevur verið opið í næstan tríggjar tímar.
/Ritzau/
