Tvey skip og tvær skipabrúgvar hava fingið skaða í einum ukrainskum dronuálopi á Volna í russiska økinum Krasnodar.
Tað boða myndugleikarnir í økinum, sum liggur í landsynningspartinum av Russlandi, frá mánanáttina, sambært tíðindastovuni Reuters.
Øll manningin á skipunum er flutt til trygdar, upplýsir boðtænastan Telegram frá myndugleikunum í Krasnodar.
Álopið elvdi eisini til, at eldur kom í, stendur í fráboðanini. Tað er ikki greitt, um eldurin er sløktur.
Ukraina hevur ikki gjørt viðmerkingar til fráboðanir um dronuálopið.
Tað fæst ikki at vita, hvørji skip talan er um. Umfangið av skaðunum er heldur ikki greitt.
Myndugleikarnir í Krasnodar boðaðu eisini frá álopi úr Ukraina í síðstu viku.
Tað stendur, at tvey fólk fingu skaða í einum dronuálop, sum eisini gjørdi skaða á fleiri hús í økinum.
Álopið elvdi eisini til streymslit fleiri staðni, stendur í fráboðanini.
Kríggið millum Russland og Ukraina hevur vart í skjótt fýra ár, og evropeiskir leiðarar stríðast framvegis við at fáa enda á tí.
Amerikonsk, evropisk og ukrainsk embætisfólk hittust um vikuskiftið í amerikanska statinum Florida, har tey høvdu samrøður um støðuna.
Amerikanski sendimaðurin, Steve Witkoff, kallaði fundirnar í gjár produktivar, og hann segði, at tað høvdu samráðingarnar við Russland eisini verið.
Amerikanski forsetin, Donald Trump, hevur stríðst fyri, at Ukraina og Russland fáa eina avtalu skjótast gjørligt. Russland vil tó varðveita tey ukrainsku økini, sum tað hevur hertikið, meðan Ukraina hevur noktað at avhenda øki.
Undan fundunum í Miami vístu amerikanska fregnartænastan, sambært tíðindastovuni Reuters, á, at russiski forsetin, Vladimir Putin, ikki hevur givið upp síni mál um at yvirtaka ukrainskt øki. Tað siga seks ónevndar keldur við vitan um málið.
/Ritzau/
