Í veljarakanningini, sum Fynd hevur gjørt fyri Sosialin sæst, at Miðflokkurin hevur størstu framgongdina í mun til valið í 2004. Flokkurin fer úr 5,2 prosentum upp í 10,3 prosent av atkvøðunum. Hetta er sostatt ein framgongd á heili 5,1 prosent. Jenis av Rana, formaður Miðfloksins, fegnast um góða úrslitið, og sigur, at fyri eini fýra árum síðani, lá flokkurin altíð millum 3 - 5 prosent.
- Men seinasta árið hava vit ligið um seks og úti ímóti tíggju. Hetta sigur mær somikið sum, at framgongdin er støðug, sigur Jenis av Rana.
Leggur seg á vinstra borð
Hann roknar eisini við, at umframt etisku virðini, so hava fólk fingið eyguni upp fyri sosialu virðunum, sum flokkurin leggur fyri dagin.
- Vit hava ofta verið skuldsett fyri ongan politikk at hava. Men nú er tað við at ganga upp fyri fólki, at vit hava eina meining um øll onnur mál á tingið, og so hava vit eisini fingið Karsten Hansen við, sigur Jenis av Rana, sum heldur hetta sigur somikið sum, at brúk er fyri Miðflokkinum, eisini undir hesum valskeiðinum.
- Hóast samgongan hevur ein sosialan flokk, so er tað tann kaldi og kyniski fólkaflokspolitikkurin, sum stendur eftir. Vit eru komin við fleiri sosialum- og heilsumálum, og tað ger mun. Harumframt hava eg gjørt vart við meg í Føroya Banka málinum, har eg havi staðið rættiliga einsamallur. Nógv fólk taka undir við mær í hesum, og tað átti at verið fleiri í Tjóðveldisflokkinum og Javnaðarflokkinum, sum høvdu somu áskoðan, sigur Jenis av Rana, sum heldur, at fyri fáum árum síðani hevði øll hendan privatiseringin verið óhoyrd, sum hann tekur til.
Jenis av Rana heldur sum so ikki at 266b hevur givið flokkinum so nógv meira, tí tann spurningurin hevur altíð verið eitt stríðsmál.
- Tað hevur ikki givið útslagið, hóast tað eisini hevur havt sína ávirkan, sigur Jenis av Rana.
