Tvey universitet eru í Aberdeen - Aberdeen University og Robert Gordon University.
Einir 10 føroyingar lesa í løtuni á hesum báðum universitetum í Aberdeen.
Ein útbúgving, sum alt fleiri føroyingar eru farnir undir, er MBA (Master of Business Administration). Hetta er ein sera væl umtókt altjóða útbúgving, sum gevur breiðan førleika innan leiðslu. Einir 6-8 føroyingar hava tikið hesa útbúgving ymsa staðir úti í heimi - teir flestu í Bretlandi. MBA lesnaður tekur vanliga 1,5 - 2 ár, um lisið verður fulla tíð, tvs. dag undirvísing, og umleið 3-5 ár um lisið verður parttíð, tvs. við kvøld og vikuskiftis undirvísing. Neyðugt er at hava hóskandi útbúgving og arbeiðsroyndir áðrenn MBA lesnaður kann byrja.
MBA útbúgving fæst eisini í Aberdeen - á Aberdeen Business School, sum er partur av Robert Gordon University. Í millum prógvini frá Robert Gordon University í ár, sum vórðu handað á hæbarsligari samkomu tann 6. december, var eisini eitt MBA prógv handa einum føroyingi. Tað er Bjarti Thomsen, Argir, sum júst hevur lokið MBA prógv. Og í september í ár byrjaði ein annar føroyingur, Hans Jákup Mikkelsen, úr Gøtu, sama lestur á Aberdeen Business School.
Á Aberdeen Business School, eru umleið 15-20 sum hvørt ár lesa MBA fulla tíð og eini 40-50 sum lesa MBA parttíð. Tey sum lesa MBA parttíð á Aberdeen Business School eru oftast bretar sum hava fast arbeiði (oftast í oljuvinnuni), meðan tey sum lesa fulla tíð eru sum oftasst útlendingar. Í flokkinum, sum Bjarti gekk í, vóru t.d. 19 næmingar, umboðandi 14 ymisk lond í Asia, Afrika, Suðuramerika og Europa. Hetta gevur eitt sera ríkandi og spennandi altjóða umhvørvi.
At lesa MBA kostar ikki einki. Ein MBA útbúgving á Aberdeen Business School kostar í løtuni 11.000 £ (130.000 kr) og harafturat kemur livikostnaður í Aberdeen. Føroyski stuðulsstovnurin letur stuðul til tílíkt skúlagjald og danskur útbúgvingarstuðul (SU) fæst sum ískoyti til livikostnað. Livikostnaðurin (íbúð, føði, klæði vm.) í Aberdeen er nakað tað sama sum í Føroyum.
