Áhugin hjá Maud fyri mati byrjaði í 1982 í Póllandi, har hon var á einum garði. Har hevði ein kókikona á garðinum ein hestavogn, sum hon brúkti at koyra stórar grýtur við um summarið til jarðarferðir, fermingar og annað gott.
? Hetta helt eg vera ógvuliga spennandi, sigur Maud.
? Hon var sjálvforsýnandi við kjøti, eplum og øllum, og eg helt hetta vera ógvuliga undrunarvert. Og soleiðis byrjaði eg so smátt at hugsa um at gerast kokkur.
Maud byrjaði á kokkaskúlanum EFG í eitt ár, og fór síðani í læru í Brønnum eftir tað.
Døma hvítleyk
Sjálv sigur Maud, at hon etur ikki meira hvítleyk enn onnur. Tó so, á Hotel Hafnia verður nógvur hvítleykur brúktur um dagarnar, og Maud heldur, at fólk gera av frammanundan, hvat tey halda um hvítleyk, og hon heldur ikki, at tey 80 fetini av hvítleyki, hon brúkti í sjónvarpinum, høvdu so nógv at siga. Hon sigur seg ofta hava verið við til at gera mat til fólk, ið siga seg als ikki dáma hvítleyk, men hóast tað, so hevur hvítleykur verið í matinum, og tey hava als ikki varnast hetta.
? Talið av hvítleyki hevur onki at siga, tað er smakkurin sum telur, greiðir Maud frá.
? Eg havi arbeitt á støðum har vit hava fingið boð um at brúka so lítið av hvítleyki sum møguligt, soleiðis at hvítleyksbrúkið varð avmarkað. Her á Hafnia er tað øvugt. Her verða vit næstan eggjað til at brúka hvítleyk.
Einasta kravið á Hotel Hafnia viðvíkjandi mati er, at buffetin verður gjørd. Til restina fáa kokkarnir fríar hendur, og heldur Maud, at hetta er ógvuliga spennandi, og hevur hetta við sær nýggjar avbjóðingar hvønn dag. Tað gongur ikki ein dagur, har nýggir og spennandi rættir verða tilgjørdir, og er ein av høvuðsgrundunum, at íblástrarkeldan er í sjálvum køkinum. Tí í køkinum á Hotel Hafnia eru ikki minni enn seks ymsar tjóðir umboðaðar.
? Rættirnir, sum koma undan kavi, koma heilt frá uppvaskara til kokk, og ofta byggja vit víðari uppá aðrar uppskriftir, sigur hvítleykskokkurin.
Guðmundur Guðmundsson, kendur frá sjónvarpinum, leggur afturat, at ein kokkur er ongantíð útlærdur, tí avbjóðingarnar eru óteljandi.
Bíligt, skjótt og lætt
Sjálvari dámar Maud best at gera suðurlendskan mat, og finnur hon meginpartin av sínum íblástri í turkiska køkinum.
? Turkiski køkurin hevur nógvar smáar rættir, sum smakka av nógvum, og dámar mær hetta ógvuliga væl, sigur Maud.
? Men um eg veruliga skal hugna mær heima við hús, so geri eg ræst kjøt, tí tað dámar mær best.
Maud heldur, at føroyingar hava tann fyrimunin, at tað føroyska kjøtið verður kryddað av Várharra.
? Tað einasta vit skulu gera er at tilseta vatn og eitt lítið sindur av salti. Sjóluftin ger, at tann føroyski mátin at goyma mat uppá, ger føroyska kjøtið heilt serligt, og er føroyskt kjøt nakað, sum vit skulu halda fyri okkum sjálvi og ikki flyta út, sigur ein flennandi Maud Matras.
Sambært Maud, so hava fólk ein óvana at hanga seg ov nógv í uppskriftirnar, teimum verða givnar.
? Tað bilar onki, um tú ikki eigur basilikum ? ger bara rættin uttan basilikum. Mær hevur verið fortalt, at tú skalt lesa eina uppskrift tríggjar ferðir ígjøgnum, og síðani gera hana, soleiðis tú minnist hana, tí tú minnist bara tað tær dámar.
? Sjónvarpið, vikubløð, kókibøkur og annað hjálpa fólki at koma í gongd. Eg havi tað grundreglu, at maturin sum eg geri, skal vera bíligur, skjótur og lættur at gera, sigur Maud at enda.
Men a la carte matskráin hjá Hotel Hafnia kann í øllum førum reypa av, at allir rættirnir, ið eru at fáa, eru heimagjørdir rættir, tað vil siga teir hava allir sæð sín fyrsta tallerk í køkinum á Hotel Hafnia.
