Tá lestrarstevnan Markleys Útbúgving 2006/07 leggur frá landi hósdagin 28. september kl.10, so er ikki bert talan um ein talumáta, tí stevnan er umborð á Smyrli. Umframt kunning um leyst og fast viðvíkjandi lestri, verður tónleikur við Føroya glaðasta bólki Lama Sea, ella kanska í hesum føri Lama AT Sea.
Á lestrarstevnuni vera umboð úr nógvum ymiskum londum, lærustovunum, felagskapum og virkjum, og fyrilestrar og kunning er allan túrin í Matstovuni og í Fundarrúminum.
Til ber eisini at hitta fólk, sum arbeiða umborð á Smyrli og hoyra tey greiða frá um teirra útbúgving og starv. Tað eru tríggir starvsbólkar, sum greiða frá: á brúnni í maskinrúminum í køks- og tænastudeildini.
- Útbúgving er sera avgerandi, bæði fyri tann einstaka og fyri samfelagið. Útbúgving styttri ella longri er næstan ein treyt, skalt tú fáa eitt spennandi og mennandi lív. Í samfelagi okkara er náttúrutilfeingið ikki so stórt. Tí er tað av alstórum týdningi, at tey ungu fáa útbúgvingar, um vit skulu klára at halda livistøðinum í altjóða kappingini. Markleys Útbúgving 2006/07 roynir at lata upp fyri teimum mongu ókendu valmøguleikunum, sum finnast bæði nær og fjar, sigur Holgar Arnbjerg, ið samskipar tiltakið vegna Mentamálaráðið, LV-felagið, Meginfelag Føroyska Studenta og Altjóða Skrivstovuna
Skráin fyri tiltakið liggur á: www.ask.fo/tilfar/MU2006Folder.pdf
