Fýra føroyingalið vóru í leiki í bestu donsku hondbóltsdeildini hjá kvinnum í kvøld. Harímillum var ein føroyingauppgerð.
Á heimavølli eydnaðist tað Mariu P. Nólsoy og liðfeløgunum í Horsens at vinna 29-27 á Janu Mittún og hennara liðfeløgum í Viborg. Í steðginum var Horsens eisini frammanfyri við tveimum málum, 16-14.
Jana skoraði tvey mál og legði upp til fýra mál (assist). Maria legði upp til tvey mál.
Viborg er nummar fimm í deildini við 24 stigum. Horsens er nummar átta við 14 stigum.
Marita Mortensen og liðfelagarnir í HØJ taptu á heimavølli stórt 18-36 (9-17) fyri stórliðnum, Team Esbjerg.
Marita skoraði trý mál.
