Høvuðsvinningurin í gekka-spælinum í kvøld var á 1,8 miljónir krónur.
Tað var Margit Brøndum Johannesen í Klaksvík, ið fekk fulla plátu og slapp at royna eydnuna.
Hon valdi at deila tær 1,8 miljónirnar í teir tríggjar leyparnar - við 600.000 krónum í hvørjum leypi.
Tað gekk ein pinkalítil løta, áðrenn hon fekk hjólið at mala. Margit trýsti á 1-talið bæði einaferð og tveir ferðir, áðrenn hjólið fór av fetanum.
Men, í triðju royndini fór hjólið at mala - og tað mól passaliga væl, má leggjast aftrat.
Hjólið mól nevniliga so væl, at tá tað steðgaði aftur, steðgaði tað longu í fyrstu royndini á bláa leypinum.
Her hevði Margit Brøndum Johannesen lagt triðingin av høvuðsvinninginum, 600.000 krónur, sum nú vóru hennara.
- Oh, my God! Haldi, eg steðgi.... segði kvinnan úr Klaksvík.
Børn hoyrdust rundan um hepnu kvinnuna, og eingin ivi var um, at øll vóru ovfarin og ovurfegin. Gekka-verturin, Jensina Olsen, helt fyri, at nú máttu børnini fáa nakrar ísar í kvøld.
- Tað gongur kanska upp fyri tær í morgin ella í ovurmorgin, hvat tú hevur vunnið, helt gekka-verturin fyri.
Jensina Olsen tóktist líka so spent sum kvinnan úr Klaksvík, og hon leyp upp frá, tá hjólið steðgaði á bláa leypinum.
Tað var ein ógvuliga fegin, Margit Brøndum Johannesen, sum takkaði fyri góða vinningin, sum henni fall í lut í kvøld.
