Upplýsingarnar eru komnar fram í einum sakarmáli ímóti Dell'Utri, sum fyrr hevur verið stjóri í einari reklamufyritøku, sum Silvio Berlusconi, forsætisráðharri eigur. Fyrrverandi stjórin er ákærdur fyri at hava havt samband við mafiuna.
Í sambandi við málið avhoyrdi ein dómstólur á Sisilia fyrradagin fyrrverandi mafialeiðaran Antonino Giuffre, og í rættinum greiddi hann frá, at Berlusconi hevði havt ein fund við teir fremstu mafialeiðararnar á Sisilia í áttatiárunum. Fundurin var heima hjá Berlusconi í Milano.
Sambært Giuffri endaði hetta við, at mafian fór í hernað ímóti teimum kristiligu demokratunum, og endin var, at flokkurin fór í upploysn í 1993. Um hetta sama mundið fór Berlusconi undir at skipa sín egna flokk, Forza Italia, sum skuldi fáa fatur á veljarunum, sum teir kristiligu demokratarnir høvdu havt. Tað eydnaðist eisini.
