Barnafamiljur kunnu byrja at gleða seg til at fáa meira pengar um hendi. Fíggjarmálaráðið boðar nevniliga frá, at ætlanin er at hækka barnafrádráttin fyri børn millum 0 og 6 ár við 2.700 krónur. Harvið verður lovað at hækka frádráttin úr 6.500 krónur og 9.200 krónur.
- Við hækkingini verður samlaði miðal barnafrádrátturin fyri børn yngri enn 7 ár 15.550 krónur árliga, fyri hvørt barnið. Hetta er grundað á, at miðalbarnafrádrátturin hjá kommununum er 6.350 krónur í 2016, og afturat hesum kemur barnafrádrátturin hjá landinum í 2017 á 9.200 krónur árliga, skrivar Fíggjarmálaráðið í tíðindaskrivi.
Barnafamiljurnar fáa tó ikki ágóðan beinanvegin, men talan er um eina hækking, ið hædd verður tikin fyri í fíggjarkarmunum. Harvið skal peningur fyrst setast av á fíggjarlógini, ið verður viðgjørd í tinginum í heyst.
- Smábarnafamiljurnar eru millum tey, ið ofta eru fíggjarliga sperd. Við hesum hækkaða barnafrádráttinum lætta vit um gerandisdagin hjá barnafamiljunum í Føroyum. Vit hava longu longt barsilstíðarskeiðið við 6 vikum, hava sett í verk ískoyti til barnafamiljur í trongum fíggjarligum korum, og hava veitt lág- og miðaløntum ein skattalætta á 137 mió. kr. í 2016. Nú taka vit enn eitt stig við økta barnafrádráttinum, sigur Kristina Háfoss, landsstýriskvinna í fíggjarmálum.
Í alt verður mett, at hækkingin kostar landskassanum 12 milliónir krónur.
