Løgreglan hevur í morgun lagt út á sín Facebook-vanga, at venjingar verða á Vestaru Bryggju í Havn og niðri í Hoyvíkini í dag, bæði fyrrapartin og seinnapartin.
Venjingarnar halda fram í morgin og hósdagin, men tað er ikki heilt greitt í løtuni, um talan eisini verður um fyrrapart og seinnapart báðar teir seinnu dagarnar.
- So, um fólk síggja vápnaða løgreglu og bilar við Bacalao og niðri í Hoyvíkini hesar tríggjar dagarnar, er talan bara um venjing, sigur vaktleiðarin í morgun.
Løgreglan fer at seta upp skelti, sum siga, at her eru venjingar, og vaktleiðarin sigur í morgun, at hetta eru nøkur "konseptir", sum tey fara at venja.
Á fundi tíðliga í morgun nágreinaði løgreglan ikki júst, hvat tað er, tey venja, men vaktleiðarin legði aftrat, at hetta er venjingar, sum løgreglan plagar at hava.
