Í kvøld klokkan 20 fer Klæmint A. Olsen at spæla seinasta dystin fyri Breiðablik, tá Breiðablik á Laugardalsvøllinum spælir fjórða dystin í bólki B í Europa Conference League.
Dysturin verður móti belgiska liðnum Gent, ið vann stórsigur 5-0 á Breiðablik á heimavølli í Belgia.
Breiðablik hevur enn fyrsta stigið til góðar í bólkinum.
Klæmint hevur skotið 13 mál í 35 almennum dystum fyri Breiðablik.
Klæmint hevur hetta árið skrivað søgu. Fyrst saman við liðfeløgunum. Breiðablik er fyrsta íslendska liðið sum vinnur seg í eitt evropeiskt bólkaspæl. Breiðablik skoraði tvey tey fyrstu málini í bólkaspælinum í 2-3 tapinum fyri Maccabi Tel Aviv á útivølli. Klæmint skoraði bæði málini, og gjørdist sostatt tann fyrsti leikarin at skjóta eitt mál fyri eitt íslendskt lið í einum evropeiskum bólkaspæli.
Höskuldur Gunnlaugsson, liðskipari hjá Breiðablik sigur í samrøðu við Morgunblaðið, at tað hevur havt eitt stórt gagn og virðið at hava Klæmint á liðnum. Liðskiparin heldur fyri, at Klæmint er ein maður av fremsta klassa: - Klæmint er tann heiðurligasti maðurin eg havi møtt, bæði á fótbóltsvøllinum og uttanfyri fótbóltsvøllin, sigur Höskuldur Gunnlaugsson.
Liðskiparin heldur, at Klæmint er ein framúr góður fótbóltsleikari, ið hevur roynst Breiðablik drúgvur, bæði til dystirnar og undir venjing hevur hann sýnt ein framúr góðan hugburð. Höskuldur Gunnlaugsson staðfestir, at teir í Breiðablik fara at sakna Klæmint bæði á vøllinum og uttanfyri vøllin.
