Um føroyski fólkatingsmaðurin Magni Arge verður afturvaldur til næsta val, so kunnu hvørki Mette Frederiksen ella Lars Løkke Rasmussen taka hansara parlamentariska stuðul fyri givið, tá teljast skal upp í 90 sessir á valkvøldinum.
Føroyski fólkatingsmaðurin sigur við danska miðilin Altinget, at hann fer at stuðla tí leiðaranum, ið lovar at gera mest fyri Føroyar. Tað skrivar KNR.
- Tann stjórnin, ið bjóðar bestu umstøðurnar til Føroyar, verður tann, ið vit fara at stuðla. Tað sigur seg sjálvt, at tað er okkara uppgáva at tryggja, at Føroyar fær best møguligar umstøður, og vit hava tørv á betri umstøður enn tær, ið vit hava í dag, sigur Magni Arge, sambært KNR.
Við tí meinar Magni Arge, at hann fer at peika á tann av Mette Frederiksen ella Lars Løkke Rasmussen, ið er til reiðar at geva Føroyum mest sjálvræði, harímillum í uttanríkismálum.
Tað merkir eisini, at hann fer als ikki at taka hædd fyri, um tað verður ein borgarlig ella sosialdemokratisk stjórn, ið hann peikar á.
- Vit hava aldrin sagt, at vit eru antin reyðir ella bláir. Vit eru faktiskt næstan hvítir, um man so kann siga, tí tað eru tey føroysku áhugamálini, ið telja mest, sigur Magni Arge við KNR.
