Fólkaskúlin
Finnur Helmsdal sigur í lesarabrævi sínum, at hóast vit hava nógvar góðar skúlar og dugnaligir lærarar, so eru tað nógv børn í Føroyum, sum als ikki fáa møguleika at læra, búnast og mennast.
- Fólkaskúlin hevur ein serstakliga veikan lið, og tað eru børnini, ið ikki hava bestu fakligar, andaligar og sosialar førleikar, børn við ADHD, børn við Asberger syndromi ella øðrum líknandi í autismuspektrinum, børn sum eru orðblind, ella børn við trupulleikum, sum eingin rættiliga megnar at navngeva, sigur Finnur Helmsda í lesarabrævinum.
Skúlaskipanin okkara stórt sæð einki tilboð til hesi børnini, hvørki innan fólkaskúlagátt ella uttanfyri. Og úrslitið av hesum eru børn, sum einki hava lært og sum ikki eru tillagaðaði ella fyrireikaði til at fara út í samfelagið.
Ábyrgdina fyri hesum oyðiløgdu lívum eiga ikki einstaku skúlarnir og lærarnir, men politikarnir, sum lóggeva, og Mentamálaráðið, sum umsitur økið.
Vøkur orð
Fólkaskúlalógin frá 1997 staðfestir, at Uppgáva fólkaskúlans er við atliti at tí einstaka næminginum og í samstarvi við foreldrini at fremja, at næmingarnir nema sær kunnleika, fimi, arbeiðshættir og málbúnar, sum stuðla tí einstaka næminginum í fjølbroyttu, persónligu menningini.
Og hetta skal gerast við at skapa sovorðin líkindi fyri uppliving, virkishugi og djúphugsan, at næmingarnir kunnu menna sína samkenning, sítt hugflog og hug at læra, og at teir kunnu venja síni evni til sjálvstøðuga meting, støðutakan og virkan, og búnast í treysti til sín sjálvs og til teir møguleikar, sum eru í felagsskapinum.
Trupulleikin er, sigur Finnur Helmsdal, at endamálsorðingin er skrivað av eftir til dømis øðrum norðurlendskum fólkaskúlalógum. Orðini eru vøkur, men tey hava ongantíð fingið føroyskt rótfesti, og tí passa orð og veruleiki ikki saman.
Sansaleyst mentamálaráð
Men trupulleikin er eisini sjálv umsitingin í Mentamálaráðnum, har embætisfólkini eftir øllum at døma hava mist allar sansir, tá tað kemur til tey veiku børnini, heldur Finnur Helmsdal.
Hann samanber Mentamálaráðið við tær tríggjar apurnar, sum hvør í sinum lagi blokera fyri, at mest vitalu sansirnir virka. Tey síggja ikki trupulleikan, tey hava ongan tíð hoyrt um hann og tey tosa ikki um hann.
Sambært Finni Helmsdal hevur ráðið sum heild ongantíð tikið hendan trupulleika í so stórum álvara, at miðvíst og munagott arbeiði er sett ígongd, staðfestir hann og vísir á, at talið av børnum, sum antin lítla og onga ella ikki-viðkomandi undirvísing fáa, er vaksandi.
Niðurstøðan hjá Finna Helmsdal, politikara og sosialráðgeva er tí, at Mentamálaráðið svíkur bæði skúlar og lærarar, umframt sjálvandi børnini og familjur teirra.
Myndatekstur
Sambært Finni Helmsdal, sosialráðgeva og løgtingslimi fyri Tjóðveldi, hevur Mentamálaráðið ongantíð tikið hendan trupulleika í so stórum álvara, at miðvíst og munagott arbeiði er sett ígongd
