Eftir kvinnudystin ímillum grannafeløgini úr høvuðsstaðnum, Kyndil og Neistan, vóru tað mansliðini hjá hesum feløgum, ið áttu tørn.
Undan kvøldsins dysti høvdu hesi lið spælt tríggjar ferðir ímóti hvørjum øðrum í landskappingini, har Kyndil hevði vunnið tveir av dystunum, meðan Neistin hevði vunnið eina.
Í kvøld vann Kyndil á triða sinni ímóti bláu grannunum í hesum kappingarárinum.
Í fyrra hálvleiki bar tó ikki til at taka dagar ímillum liðini. Tá ið liðini fóru til hálvleiks var støðan 13-12 til kvøldsins heimalið, Kyndil.
Eitt, sum hevur eyðkent Neistan í hesum kappingarárinum er, at liðið ofta fellur sundur og ikki megnar at halda einum nøktandi støði í samfullar 60 minuttir. Hetta hendi seg enn einaferð í kvøld, tí at í seinna hálvleiki var Kyndil fullkomiliga einaráðandi og vann dystin heili 31-22.
Úrslitið í kvøld merkir, at støðan í FTZ-deildini er hendan:
1. H71 - 33 stig
2. VÍF - 28 stig
3. Kyndil - 23 stig
4. KÍF - 22 stig
5. StÍF - 18 stig
6. Neistin - 14 stig
7. Team Klaksvík - 0 stig
Undan dystinum í høllini á Hálsi í kvøld var Kyndil nummar fýra á stigatalvuni, men eftir sigurin eru kyndilsmenn á bronsuplássi. Kyndil hevur tó spælt ein dyst meira enn KÍF, ið nú er dottið niður á fjórða pláss.
Neistin er framvegis á sætta plássi og hevur so at siga onki at spæla fyri restina av kappingarárinum.
Málskjúttarnir í mansdystinum í kvøld vóru hesir:
Kyndil: Hjalti Mohr Jacobsen 7, Finnur Hansson 6, Bjarni Sørensen 5, Josef Abrahamsen 5, Høgni Klein Olsen 4, David Edvardsen 2, Bartal Klein Olsen 1 og Jan Pauli Toft Johannesen 1.
Neistin: Herbjørn Lava 5, Teis Horn Rasmussen 5, Rói Berg Hansen 4, Hjalti í Jákupsstovu 3, Torkil Hentze 2, Terji Mørk 2 og Pætur Mikkjalsson 1.
