Kvívíkingur sum í gomlum døgum

Kvívíkingur eigur nógvar sigrar og nógv steyp. Eisini í FM kappingini hava kvívíkingar viðhvørt verið teir stinnastu, men nú er tað langt síðani, at teir vóru meistarar.

Hvussu tað verður í ár, fer tíðin at vísa. Síðsta FM heitið vann Kvívíkingur fyri tólv árum síðani – í 2002. Í dag legði Kvívíkingur seg fremst í FM kappingini. Á norðoyastevnu legði Kvívíkingur bragdliga fyri. Saman við Knørri og Miðvingi kappaðist hann um fremsta plássið. Í endaspurtinum var eingin ivi um, at Kvívíkingur var fremstur. Á málinum var hann eina bátslongd undan Knørri, sum aftur var gott og væl skutin undan Miðvingi.