Tað er óforsvarligt, at lærarar ikki duga fyrstuhjálp. Tað heldur nevndin í Lærarafelagnum. Í Skúlablaðnum vísir Herálvur Jacobsen, formaður í Lærarafelagnum á, at sum støðan er nú, er einki krav um, at starvsfólk í fólkaskúlanum, lærarar og leiðsla, skulu duga fyrstuhjálp og tað er óforsvarligt, heldur nevndin í Lærarafelagnum. - Í mínum hugaheimi eiga øll tey, sum eru um børn, at duga fyrstuhjálp, sigur Herálvur Jacobsen, formaður í Lærarafelagnum við Skúlablaðið.
- Vit kunnu hugsa okkum nógvar støður, har lærari er einsamallur við nógvum næmingum, eitt nú á eini ferð í haganum ella aðra staðni. - Dugir lærarin ikki fyrstuhjálp, tá ið tørvur er á tí, kemur hann í eina ræðuliga støðu og sjálvsagt eisini tann, sum er fyri óhappi, sigur formaðurin í Lærarafelagnum.
Hann heldur, at tað er løgið, at fyrstahjálp ikki er eitt ófrávíkiligt krav. - Ert tú í starvi í privatu vinnuni, til dømis á eini bensinstøð, er tað fyrsta tú verður álagdur, er at fara á skeið í eldsløkking og fyrstuhjálp. Herálvur Jacobsen heldur, at sama krav átti at verðið í fólkaskúlanum.
Kortini hava einstakir skúlar, av sínum eintingum, skipað fyri, at lærararnir verða sendir á skeið í fyrstuhjálp, og kommunan hevur so rindað fyri skeiðið. Men Herálvur Jacobsen heldur ikki, at tað er nóg mikið, at onkur ger tað av sínum eintingum.
- Tað átti at verið eitt krav frá Mentamálaráðnum, at lærarar hava skeið í fyrstuhjálp, og tað átti eisini at verið partur av ársverkinum, at lærarar nema sær hetta skeiðið. H |
Hugburðurin, at vit skulu hava ta nýggjastu vitanina og verða dagførd, liggur tíverri ikki frammarlaga í fólkaskúlanum, leggur hann afturat.
