Politikararnir høvdu eftir øllum at døma so ringa samvitsku av, at Kringvarpið nýtir lógarkravdar almennar pengar at kappast ímóti privatu miðlunum, at tá møguleikin var eisini at lýsa á internetinum, so slapp Kringvarpið ikki tað.
Men tað hevur kortini ikki so nógv upp á seg. Meðan Sjónvarp Føroya og Útvarp Føroya í sínari tíð lýstu størv leys í bløðnum, eins og flestu aðrir almennir stovnar, so lýsir Kringvarp Føroya síni leysu størv – einans – á einastu heimasíðu í landinum, sum ikki hevur lov at hava lýsingar.
Men tað ger jú einki, tí einki hendir kortini. Man hetta so vera ein byrjan upp á at útvega Kringvaprinum internetlýsingar? – og tá tað hevur gingið eina tíð, so tora politikararnir einki at gera kortini. Enn hava vit ikki sæð eitt landsstýrisfólk í mentamálum, sum er ført fyri at skapa Kringvarpinum sømulig kor, so tey sleppa undan kreativum loysnum til tess at útvega stovninum pengar.
Vit skulu hava eitt gott alment kringvarp. Men tað fáa vit bara við at gjalda tað, sum tað kostar, og tað er uppgávan hjá politikarum. Alt annað er at blæsa og hava mjøl í munninum.
