Koplingarstøðin verður væntandi tikin í nýtslu fyrst í komandi ári
Hetta upplýsir SEV á síni heimasíðu.
Eftir uppruna tíðarætlanini skuldi støðin staðið liðug í apríl í ár, og verið klár at tikið í nýtslu í heyst. Av ymsum orsøkum, m.a. koronatiltøkum, hevur tó verið neyðugt at dagføra hesa tiðarætlanina.
Kanjon er í ferð við at leggja seinastu hond á byggiarbeiðið, sum væntast at verða liðugt tíðliga í heyst, og væntandi verður støðin tikin í nýtslu fyrst í komandi ári.
Umfatandi kaðalumleggingar og aðrar tillagingar skulu til, áðrenn spenningur verður sett á, og støðin verður tikin í nýtslu.
Nýggja koplingarstøðin kemur í staðin fyri verandi koplingarstøð á Válinum, sum skjótt hevur tænt fyri seg, skrivar SEV.
