KÍ fegnast um javnleik

Toppdysturin við Margáir millum EBS/Skála og KÍ endaði 2-2. Tað ber við sær, at KÍ framvegis er tvey stig undan EBS/Skála í kappingini um FM heitið.

EBS/Skála var frammanfyri við tveimum málum eftir fyrra hálvleik og inntil miðskeiðis í seinna hálvleiki. Seks minuttir undan leikloki javnaði KÍ til 2-2 við máli, sum kann fara at vísa seg at vera avgerandi í FM kappingini.

Álopið var fínt, og Eyðvør Klakstein átti snilda uppspælið til Mariu Biskopstø, sum eitt sindur innanfyri brotsteigarmarkið og eitt vet til høgru sendi bóltin flatt og umvegis handara stólpa og í málið.

KÍ hevði lotið undan í seinna hálvleiki, tá ið tað hjá heimaliðnum fyri tað mesta snúði seg um at verja og halda tørn um leiðsluna.

Eyðvør Klakstein minkaði um munin til 2-1 miðskeiðis í seinna hálvleiki. Tá var álopið í høgru, og Maria Biskopstø átti innleggið.

Lítla løtu eftir at KÍ hevði strítt seg upp á 2-2, hevði heimaliðið heilt góðan møguleika at leggja seg aftur á odda. Rakul Magnussen var leys innanfyri KÍ verjuna, men Óluva Allansdóttir Joensen fekk akkurát hondina á bóltin, tá ið Rakul royndi at lyfta bóltin upp um málverjan.

Lea Lisberg legði eftir 10 minuttir heimaliðið á odda 1-0 við skoti úr spískum í vinstru, og Fríðrún Olsen økti tíggju minuttir seinni um munin til 2-0 í nett sama slag støðu.

Eisini í fyrra hálvleiki var KÍ meiri á bóltinum, men tá eydnaðist tað ikki at bróta ígjøgnum skilagóðu og væl skipaðu EBS/Skála verjuna.

Í seinna hálvleiki øktist KÍ trýstið, og tá eydnaðist tað KÍ at skjóta tvey mál.

Fyrr í dag vann B36 3-2 á Dungasandi í Sørvági ímóti 07 Vestur, sum var frammanfyri 2-1, inntil tað restaðu smáir tíggju minuttir. Emma Hansdóttir skoraði B36 sigursmálið í næstsíðsta minutti.

07 Vestur – B36 2-3 (0-1)

0-1: Jacoba Langgaard 26.

1-1: Sesilia Olsen 59.

2-1: Evelin Da Silva Mastropasqua 73.

2-2: sjálvmál 81.

2-3: Emma Hansdóttir 89.

EBS/Skála – KÍ 2-2 (2-0)

1-0: Lea Lisberg

2-0: Fríðrún Olsen

2-1: Eyðvør Klakstein

2-2: Maria Biskopstø

Í morgin

HB - NSÍ

AB/B71 - Víkingur