Havstovan hevur í ár havt gongd í nógvum ymiskum verkætlanum, og ein teirra hevur verið at kanna broytingar í nøgd av upsa, toski og hýsu á Føroyabanka við hjálp av umhvørvis-dna.
- eDNA er DNA, ið allar livandi verur lata út í umhvørvið. Frammanundan hevur eydnast at ávísa eDNA frá toski í sjónum og eisini er eydnast at ávísa eitt samband millum nøgdir av eDNA í sjónum og nøgdir av toski í nærumhvørvinum, skrivar Havstovan.
Verkætlanin hjá Havstovuni skuldi vísa, um tað eisini bar til at ávísa eDNA frá hýsu og upsa á Føroyabanka, nú tað frammanundan eydnaðist við toski.
- Eisini verður kannað, um samband er millum nøgdirnar av eDNA í sjónum og nøgdirnar av hesum báðum fiskasløgunum í nærumhvørvinum.
- Um eitt slíkt samband kann ávísast, verður kannað, um til ber at nýta eDNA í sjónum til at ávísa broytingar í nøgdunum av toski, hýsu og upsa frá tíð til aðra á Bankanum, skrivar Havstovan í ársritinum Sjóvarmál, ið er at lesa á heimasíðuni hjá Havstovuni.
