Finska løgreglan hevur nú funnið eitt fleiri kilometrar langt "sleipispor" eftir havbotninum í Eystursjónum.
Sambært svensku kriminalløgregluni bendir alt á, at sporið stavar frá tangaskipinum, Eagle S, sum sigldi úr Sankta Pætursborg í Russlandi.
Skipið hevur verið undir illgruna fyri at hava framt herverk á Estlink 2-streymkaðalin millum Finnland og Estland.
Fleiri aðrar illgrunasamar hendingar hava verið við kaðalslitum í Eystursjónum seinastu tíðina.
- Við undirsjóvarkanningum er okkum higartil eydnast at staðfesta sleipispor eftir havbotninum - frá byrjan til enda.
Tað sigur kanningarleiðarin hjá finsku kriminalløgregluni, Sami Paila, í tíðindaskrivi, sum finska ávísin, Hufvudstadsbladet, var millum fyrstu miðlar at bera.
Verdens Gang veit at siga, at Eagle S er undir illgruna fyri at vera ein partur av russiska "skuggaflotanum", men skipið hevur ikki heimstað í Russlandi.
- Tað kann taka mánaðir at umvæla skaðan á Estlink 2-streymkaðalin, og í løtuni órógvar vánaliga veðrið á leiðini eisini kanningararbeiðið.
Lagt verður aftrat, at tað var jóladag, at streymkaðalin millum londini fórst, og staðfest er av svensku kriminalløgregluni, at Eagle S hevur mist annað ankarið.
##med2##
