Islamski yvirgangsfelagsskapurin Islamski Staturin hevur tikið ábyrgdina fyri yvirgangsálopini í Brússel í dag, ið hevur kravt í minsta lagi tretivu mannalív í belgiska høvuðsstaðnum.
Yvirgangsfelagsskapurin skrivar, at teirra fólk lupu á fleiri mál við bumbum og øðrum vápnum, tí Belgia er eitt av teimum londunum, ið tekur lut í stríðnum móti IS í Sýria og Irak.
Sambært IS, so skutu teirra fólk fyrst eftir fólki í flogvøllinum, áðrenn tey sprongdu seg sjálvi í luftina. Løgreglan hevur funnið eina maskinbyrsu á staðnum, og vitnir á staðnum søgdu eisini, at tey hoyrdu skot og arabisk róp, áðrenn bumburnar brustu.
Viðvíkjandi álopinum á Maalbeek metrostøðina skrivar felagsskapurin, at tað var eitt sjálvmorðsbumbufólk, ið sprongdu seg sjálvt í luftina.
Keldur innan iraksku fregnartænastuna siga við AP-tíðindastovuna, at IS valdi Brússel sum yvirgangsmál aftaná, at myndugleikarnir fríggjadagin handtóku ein av høvuðsmonnunum handan álopini í París, Salah Abdeslam.
