Seinnapartin skipar Skótalið KFUMs í samstarvi við Skótafylki Sigmundar Brestisson og Havnar KFUK skótum fyri stórum skótadegi í Tórshavn.
Júst sum í gomlum døgum fer ein rúgva av skótum at møtast á Vaglinum klokkan 14 í dag.
Fyri skótar er dagurin í dag ein heilt serligur dagur. Tann 22. februar er føðingardagurin hjá Lord og Lady Baden-Powell, sum eru fólkini, ið stovnaðu skótarørsluna.
Dagurin verður nevndur Hugsunardagur, og um allan heim skipa skótar fyri tiltøkum, og ljós verður varpað á skótar og teirra arbeiði.
Í Føroyum hevur verið vanligt, at skótarnir bjóða til eina serliga skótaguðstænastu, har seinasta brævið, sum Baden-Powell skrivaði til heimsins skótar, verður lisið upp. Guðstænastan, sum er klokkan 18 í Havnar Kirkju, er almenn.
Skráin fyri dagin sær soleiðis út:
14:00 Møta á vaglinum og deila upp í bólkar
14:30 Hugsunardagurin verður settur av Heðini Mortensen, borgarstjóra
14:45 Postarrenning
17:00 Legubál uppi á KFUK trøðni
18:00 Kirkjugongd í Havnar Kirkju
19:00 Døgurðabiti og aftaná leiðarahugni.
