Indiski rúmdarstovnurin hevur í dag við hepni sent út eina rakett, sum skal føra eitt ómannað rúmdarfar á Mánan.
Tiltakið skal røkka málinum í næsta mánaði við at lenda á suðurpóli Mánans.
Eingin leiðandi rúmdartjóð hevur áður verið har, og hepnast tað, fer tað at stimbra støðu India sum leiðandi veldi í Rúmdini.
Rakettin varð sent út av rúmdarstøðini Andhra Pradesh.
16 minuttir seinni loysti lendingarfarið Chandrayaan-3 seg og varð sent í ringrás um Jørðina.
Haðani skal tað við eini knappari sneiðing sendast á ferðina móti Mánanum og ætlaðu lendingini.
Um tiltakið eydnast, so verður India lagt afturat hinum trimum londunum, sum hava verið før fyri at lenda á Mánanum. Tey eru USA, fyrrverandi Sovjetsamveldið og Kina.
Men tað er bara USA sum hevur havt fólk á Mánanum. Fyrstu ferð í 1969.
Um tað gongur eftir ætlan fer Chandrayaan-3-farið at verða tað fyrsta at lenda á suðurpóli Mánans. Tað verður eftir ætlan 23. august.
Tað er eitt øki, sum hevur serligan áhuga fyri rúmdarfelagsskapir og privatar aktørar í Rúmdini. Tí har kann finnast vatn sum ísu. Ein avgerandi treyt, um tað í framtíðina skal gerast ein rúmdarstøð á Mánanum.
India hevur áður roynt at lenda á suðurpóli Mánans. Tað var tann sonevnda Chandrayaan-2-ætlanin í 2019. Tað eydnaðist at fáa rúmdarfarið í ringrás, men tá tað skuldi lenda á mánanum, knústist tað nærindis staðnum, har Chandrayaan-3 fer at royna at lenda.
Chandrayaan merkir á »mánaakfar«. Talan er um eitt tveir metra høgt landingarfar, sum hevur ein rovara – eitt akfar, sum er sniðgivið til at flyta seg við suðurpól Mánans.
Tað er konstruerað til at virka í tvær vikur. Har skal tað fremja eina røð av royndum.
Mánaðferðin »fer at bera tjóð okkara vón og dreymir«, skrivar Narendra Modi, forsætisráðharri í India, á Twitter.
/ritzau/Reuters
