Sitat: Tað gleðir meg, tá tað gongur øðrum væl, og tá órættvísi ímóti øðrum, sum ikki hava somu rættindi sum vit onnur, verður rætta til rættvísi.
Navn: Súni Selfoss
Lýs teg sjálvan við trimum orðum:
Pliktuppfyllandi, hjálpsamur, ágrýtin.
Hvat merki er bilur tín?
Chevolet Cruze
Hvat merki er telefon tín?
Sony
Hvør er tín besta summarfrítíðaruppliving?
Í 2012 pakkaðu vit bilin og fóru til Svøríkis í feriu, vit støðgaðu í Vimmerby, sum er best kendur fyri Astrid Lindgren og hennara frálíku søgur. Í Vimmerby er ein Astrid Lindgren World við øllum teimum kendu figurunum, hetta er ein tann besta vitjanin eg havi gjørt. Sama er galdandi fyri “Skansan” í Stokkhólm, sum er ein stór park við alskyns djórum og øðrum stuttleikum. Eftir 14 aktivar dagar saman við konu og børnum, var ein sera minnilig og góð feria at enda komin, ein feria, sum vit javnan tosa um.
Hvat orð ella hvønan setning nýtir tú oftast?
OMG sigi eg rættuliga ofta, og tað er í samband við førda landspolitikkin. Ein setningur, ið eg eisini ofta sigi er “You’ll Never Walk Alone” eg elski fótbóltsliðið Liverpool FC.
Hvørjum hyggur tú at hjá hinum kyninum?
Eg hyggi eftir heildini haldi eg, er humor og lættur látur við, er tað ikki verri.
Hvat ger teg í góðum lag?
Familjan, Liverpool FC, gott veður og rættvísi ger meg í góðum lag
Hvat stressar teg?
Órættvísi og núverandi politiska stýringin stressar meg. Tað kann stressa meg, um tíðir ikki verða yvirhildnar, ella at ting ganga ov seint fyri seg, dagarnir eru so pressaðir og døgnið er ofta ov stutt til at bíða eftir øðrum, sum ikki virða tíðina hjá hinum.
Hvør er tín yndisrættur?
Allur føroyskur matur er fantastiskur. Eg elski fisk og ein góður moyrur búffur er heldur ikki at forsmáa.
Hvat gleðir teg?
Tað gleðir meg, tá tað gongur øðrum væl, og tá órættvísi ímóti øðrum, sum ikki hava somu rættindi sum vit onnur, verður rætta til rættvísi.
Hvat var seinasta ynskið, sum tú fekst uppfylt?
Eg eri ikki tann, ið gangi við so nógvum ynskjum til míg sjálvs. Eg havi í nógv ár gingið við einum ynski um at síggja Liverpool FC spæla á Anfield Road, men tað er ikki uppfylgt enn, vóni tað hendir einaferð.
Hvar arbeiðir tú?
Upprunaliga eri eg teknikari í útvarpinum hjá Kringvarpinum, seinastu sjey árini havi eg starvast sum savnavørður í bandasavninum hjá KvF.
Hví valdi tú at arbeiða innan júst hesa vinnu ella øki?
Eg havi, alt tað eg minnist, havt áhuga í teknikki, ljóði, samfelagsviðurskiftum og programvirksemi annars, nú 29 ár eftir fyrsta arbeiðsdag eri eg har enn, so eg má hava valgt rætt.
Hvør er stuttligasta uppliving tín í starvinum?
Tað er sera ringt at velja nakra serstaka uppliving burturúr, tí mangar góðar og stuttligar løtur hava verði, bæði á uttanlandsferðum í samband við fótbóltsferðir og í sendistudio við beinleiðis sendingum. Minnist serliga kvøldið, náttina og morgunin eftir minniliga dystin millum Føroyar og Eysturríki í Landskrona, tá var eg á sendivakt alla náttina, har vit sendu samrøður, heilsanir og tónleik til morgunvaktin tók yvir kl 7.15 morgunin eftir.
Hvørjum tónleiki lurtar tú eftir?
Mær dámar væl góðan rocktónleik, Queen, ELO og Joe Cocker komu mær fyrst til hugs, men tónleikur hjá Ray Charles, Mark Knopfler, Nora Jones og Billy Joel fella mær væl í oyra. Júst nú er Billy Yates, sum vitjar okkum á Sørvágs Country- & Blues festivali, spældur rættuliga nógv, serliga tá eg koyri millum Sørvág og Havnina til og frá arbeiði.
Hvat er besta uppfinningin og hví?
Klassiska svarið er nokk pencilin og annar heilivágur, ið grør tey sjúku. Eg haldi tó, at eg fari at nevna telefonina sum eina av bestu uppfinningum, tað er hon, ið hevur gjørt heimin rættuliga nógv minni, nú tað er blivi so ómakaleyst at kommunikera okkara millum. At samskiftið er so ómetaliga nógv lættari nú á døgum, eigur telefonin nokk stóru æruna av.
Hvat er besta íløgan, tú hevur gjørt?
Eg velji ikki at svara í krónum, men í tímum, tí allarbesta íløgan eg nakrantíð komi at gera, er tíðin eg brúki saman við familjuni, at hava tíðina saman við teimum við góðum práti og hugna, skuggar allar aðrar íløgur.
Hvat er títt besta heimaráð?
Ger tað tú heldur er rætt, men viðurkenn feilirnar tú gert á vegnum.
Hevur tú nakað húsdjór?
Ja, vit hava eina kettu, Rósa – ein fugl (sebrafinku) og tveir veðrar, í løtuni ansa vit einari kettu og eini hundrað akvariufiskum.
Hvat hevði tú gjørt, um tú vann eina millión?
Veit ikki um eg hevði gjørt nakað serligt. Túni uttan um húsuni hevði heilt sikkurt fingið ein ordans umgang, Eva og Halla høvdu nokk fingið eina størri konfirmantiónsgávu í heyst enn tilfeldi verður, Beinta, sum er elsta dótturin, hevði fingið alt aftur, hon dagliga letur til okkum og ikki minst systrarnar og uttanlandsferð hevði verði bíløgd til okkum øll.
Hvat hevði tú gjørt, um tú vann tíggju milliónir?
Goldið alla skuld, framtíðartryggjað børnini og tey, eg haldi nógv av, flutt restina av pengunum av landinum og strikað allar konto í føroysku bankunum.
Hvat er best við Føroyum og hví?
Føroyar hava alt tað, ein kann ynskja sær, uttan tað góða veðrið, rættvísan politikk og bankar sum hugsa um fólkið. Veðrið kunnu vit onki gera við, men standa vit saman, ber til at rista grundvøllin undir hinum báðum, gera vit tað eru Føroyar besta stað á jørð. Tað ber til um viljin er til staðar og tað er tað besta við Føroyum.
Hvar ert tú um 10 ár?
Eg eri nokk ikki farin so langt, eg eri júst nú í holt við at førleikamenna meg, eg takið Akademiútbúgving innan Leiðslu á Føroya Handilsskúla, hvar tað førir meg veit eg ikki, eg eri nøgdur við tað eg havi og gongur tað mær og mínum og Føroya landi gott, skal eg ikki krevja so nógv meira.
»Stólurin« í VikuBlaðnum 2. juni 2014
