Tað sigur Ruth Vang, forkvinna í Framsókn, í frágreiðing til ársfundin hjá flokkinum seinastsa vikuskiftið.
– Okkum dámar uppskotið betri nú, fyrst og fremst tí tað er avmarkað til fyrireikingar- og útbjóðingararbeiði. Portalar og arbeiðsvegis sum vóru partar av upprunaliga uppskotinum eru ikki við í dagførdu útgávuni, segði hon og vísti á, at linjuføringin hevur givið orsøk til nógv kjak og ósemjur og kanska serliga avleiðingarnar av linjuføringunum báðum við atliti til ferðsluna á Sandi og sambandi til Skúvoyar.
– Tað er torført hjá okkum leikfólki at taka dagar ímillum, tá tey kønu eru ósamd, segði hon.
Ruth Vang undrast á, at kostnaðurinhevur fylt so lítið í kjakinum. Men hon heldur, ein orsøk kann vera, at vit kenna ikki endaliga kostnaðin, fyrrenn tunnilin er bjóðaður út.
– Fá munnu tó vænta, at mettu áleið 4 milliardirnar fara at halda. Spurningurin er, hvussu nógv kemur omaná og hvar markið liggur, segði hon.
Forkvinnan í Framsókn segði, at hon er fullgreið yvir, at nógv fólk eru stúrin um hesa verkætlanina.
– At hon gerst ov dýr og fer at forkoma okkum fíggjarliga.
– Eg skilji væl tann óttan, og vit eru einasti flokkur, sum ikki hevur givið bindandi lyfti um at tunnilin skal gerast. Men vit hava í samgonguskjalinum bundið okkum til fyrireikandi arbeiði, sum er neyðugt fyri at koma til eina niðurstøðu um, hvørt og nær verkætlanin skal fremjast, segði Ruth Vang.
Hon staðfestir eisini, at arbeiðið, sum hendan fyrra lógin fevnir um, neyvan verður liðugt í hesum valskeiðnum, og at tað tí er ivasamt, um endalig støða verður tikin í hesum valskeiðnum. Hon segði eisini, at tað hevur stóran týdning, at vit taka okkum tíð til neyðugu fyrireikingina.
– Við tíðini fara vit eisini at síggja klárari, um vit fáa bukt við haldførisavbjóðingina fyri framman. Tað skal ongin ivi vera um, at fyri okkum í Framsókn er tað ein grundleggjandi treyt fyri at fara undir eina so stóra verkætlan, segði Ruth Vang.
Í morgun hevði løgmaður boðið tingfólkum á fund, har greitt var frá verkætlanini um Suðuroyartunnlin.
