G! Grunnurin skipar í samstarvi við búfólk í Norðra- og Syðrugøtu fyri tónleikatiltakinum HOYMA aftur í ár.
- HOYMA tiltakið varð sera vælmóttikið seinasta ár, og sostatt var tað grundarlag fyri at skipa fyri tí aftur í ár. Aftur í ár hevur áhugin verið stórur, og eru atgongumerkini so gott sum uppi, sigur Sigvør Laksá við Rás2.
Á HOYMA tiltakinum, eru tað fimm hús í Norðragøtu og fimm hús í Syðrugøtu, sum verða karmur um konsertirnar. Tað serliga er, at tónleikarirnir framføra uttan mikrofon og hátalara inni í stovunum hjá Gøtu fólki, sum setir ein inniligan dám á sjálva konsertina.
Í ár verða tað millum onnur Kári P, Marius Ziska, Greta Svabo Bech og Hanus G. Johansen, sum 'taka stykkið úr' til sínar framførslur í heimunum hjá gøtufólki frá klokkan 19 í annaðkvøld.
Sigvør Laksá, ein av fyriskiparunum, vísir á, at heitu pottarnir og sauna vera eisini opin, umframt at Tøting verður karmur um livandi tónleik eftir at HOYMA konsertirnar eru av á midnátt.
