Hóskvøldið verður ein nýggjur dokumentar-filmur hjá Sea Shepherd frumsýndur í Hollywood. Filmurin kallast Jeedara og snýr seg um átak hjá Sea Shepeherd ímóti oljuframleiðslu í Australia.
Nú um dagarnar legði ein av kendu sjónleikarunum í Hollywood ein dagføring á sín Twitter vanga, har hann viðmælti nýggja filmin hjá Sea Shepherd. Nýsælandski sjónleikarin, sum er best kendur fyri leiklutin í stórfilminum Galdiator, skrivaði soleiðis:
- Til lukku við allar herdeildirnar hjá Sea Shepherd kring heimin.
Saman við viðmerkingini legði Russel Crowe eina lýsing fyri nýggja filmin á sín Twitter vanga.
Leiðarin í Sea Shepherd, Paul Watson, takkaði kenda sjónleikaranum fyri stuðulin.
- Takk Russel Crowe fyri at hjálpa okkum at gera vart við sýningina av Jeedara í Hollywood tann 8. Juni, skrivaði Watson á sínum Facebook vanga.
Sea Shepherd fær javnan stuðul frá kendum fólki í sínum virksemi. Millum annað hevur Pamela Andersson hjálpt Sea Sea Shepherd í stríðnum ímóti grindadrápinum í Føroyum.
