? Pantera skuldi ongan verið givin at spæla, segði tann 25 ára gamli Nathan Gale, tá hann fór fram á pallin og fór at skjóta eftir bólkinum Damageplan, har tveir fyrrverandi tónleikarar í Pantera nú spæla við.
Hetta hendi á náttklubbanum Alrosa Villa í býnum Columbus í Ohio hósnáttina, og úrslitið var blóðugt.
Gale drap fyrrverandi gittarspælaran í Pantera, Darrel Abott, og og beiggi hansara, trummuspælarin Vinnie Paul Abbott, var eisini raktur av skotum, men sambært CNN er tað ikki enn váttað alment, hvussu heilsustøðan hjá honum er. Sangarin í Damageplan er eisini lagdur inn á sjúkrahús eftir hendingina.
Nathan Gale skjeyt eisini út í salin á náttklubbanum, og har lógu trý fólk eftir á.
Varð skotin sjálvur
Sambært CNN var løgreglumaðurin James Niggemeyer staddur í nánd av náttklubbanum Alrosa Villa, tá ið fráboðanin um skottilburðin kom. Hann var á staðnum tveir minuttir eftir, at fyrsta skotið varð latið av.
? Løgreglumaðurin fór uttan hjálp frá øðrum løgreglufólki inn á náttklubban gjøgnum einar bakdyr. Onkur leiddi hann til pallin, har gerningsmaðurin hevði tikið ein gísla. Tað eydnaðist løgreglumanninum at skjóta gerningsmannin, áðrenn hann fekk dripið fleiri fólk, sigur ein talsmaður fyri løgregluna í Columbus við CNN.
? Løgreglumaðurin tók ein stóran kjans við at fara einsamallur inn, men hann hevur bjargað í øllum førum einum fólki frá deyðanum. Hann er ein hetja, sigur talsmaðurin.
