Klokkan tvey seinnapartin fer U21-landsliðið á vøllin aftur. Hesaferð er mótstøðuliðið Norðurmakedónia, og dysturin, sum skuldi verða á Svangaskarði á Toftum, verður í staðin spældur á Tórsvølli.
Um hugt verður eftir úrsltinum frá fyrra dystinum millum Norðurmakedónia og Føroyar, sum varð spældur FFM Training Centre tann 10. september í fjør, er einki at ivast í, at sterk mótsøða bíðar føroyska liðnum. Ta ferðina vann heimaliðið 7-1.
Men føroyska liðið er væl fyrireikað til hesa stóru uppgávuna, og harafturat koma okkara spælarar við einum 3-1 sigri á Ísrael í skjáttuni.
Venjararnir eru eisini klárir, og nú er greitt, hvørjir teir fyrstu ellivu verða, ið byrja á vøllinum fyri Føroyar.
Rói Mørk Hentze verður í mál, og í verjuni verða Andri Benjaminsen, Ari Olsen, Bjarni Petersen og Samuel Johansen Chukwudi. Á miðvøllinum verða frá byrjan Magnus Holm Jacobsen, Stefan Radosavljevic, Petur Knudsen og Lukas Giessing, og framherjar verða Pætur Petersen og Jonn Johannesen.
FM1 hevur beinleiðis frásøgn frá dystinum. Byrjað verður klokkan 13.50.
