Heri Hjalt Mohr spældi allan dystin, tá hann og liðfelagarnir í Strømmen tóku móti Strindheim á heimavølli í triðbestu norsku fótbóltdeildini.
Aftaná tvey tap á rað reisti Strømmen seg í dag við einum greiðum 3-0 sigri.
Sindre Rindal syrgdi við tveimum málum fyrstu 15 minuttirnar fyri, at Strømmen fekk eina rimmar byrjan upp á dystin. Tíðliga í seinna hálvleiki økti Mats Lunde til 3-0.
Strømmen er nummar fimm í bólki 2 í deildini við 16 stigum fyri níggju dystir. Strømmen hevur bert trý stig upp til oddaliðið, Kjelsås sum hevur 19 stig.
Komandi leygardag klokkan 13 spælir Strømmen móti Grorud á útivølli.
